Home / archiefcentraal / denne van knoldert wachtwoard

denne van knoldert wachtwoard

Was ik net zo’n bittie an mien neeje wachtwoarden ewend, kreeg ik een computerprobleem en mos ik een neej wachtwoard nemmen…

Ik had mie in 2013 vöar al mien toegangen hetzelfde wachtwoard enömm. Mien geboartejoar en mien vöarname uut het paspoort, mar dan van achteren noar vöaren.

Vöar gmail, vöar de verzekering, vöar de nieuwsbrieven van De Telegraaf, Runnersworld, vöar inloggen bie Marktplaats en Bol.com, vöar woar ik mien klearen en schoene bestelle, vöar youtube en torrenssites, vöar toegang op het netwerk op mien werk en vöar de wifi thuus, vöar de internetanbiedingen van de Welkoop en de koffiepunten van Douwe Egberts, vöar de meterstand van gas, water en elektrisch, vöar…

Ik nume ze niet ollemoal, want ik magge niet mear dan 400 woarden schrie’m.

Mar toen kwam de joarwisseling. Bie een flink aantal mos ik mien wachtwoard veranderen. Det is op zich al een feest. De iene zeg det ie oe oale wachtwoard en doarnoa twee kear oe neeje wachtwoard mut intypen en dan is het kloar. De ander stuurt oe een link noar oe emailadres die ie dan an mut klikken (die mail kump meestentieds in de spam terechte). En een derden zeg det het better is een ander wachtwoard te nemmen, mar det det niet verplicht is. En bie de iene kun ie een cijfer of letter veranderen, bie de ander mag het neeje wachtwoard in niks op het oale lieken.

Iederiene hef zo zien eigen idee oaver veiligheid.

Ik heb dus noe dree setjes wachtwoarden, woar mien computer de meesten gelukkig gewoon onthölt. Doarnoast heb ik in de computer een documentje opesloane woarin alle wachtwoarden opesloane bent, want onthoalen is gin optie. In det documentje bent ze wel versleuteld. Ie mut steeds het twidde leasteken nemmen, mar dan wel achteran beginnen. Det ezelsbruggetie heb ik wear ergens anders opesloane.

Mar ja, toen ging mien werkcomputer dus kapot en mos ik – öm die wear an de proat te krieng, een neej wachtwoard nemmen. De computerknutselaar op mien werk deud det vöar mie. Met Zinindezomervakantievan2014! kan ik sinds kort wear in het werksysteem.

Een gemeen wachtwoard. Want iedere dag wörd ik noe op de proef esteld. Ik heb namelijk écht zin in de zomervakantie. Mar in september wördt de beproeving nog groter, denk ik.

Mar woar ik ok wel zin in heb, is een logischer wachtwoardbeleid. Iemand een idee?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.