Home / archiefcentraal / denne van knoldert mammadiploma

denne van knoldert mammadiploma

“As ie noe niet ophoalt met zöaren, dan leg ik oe fietsie op de rails, dan ridt d’r een trein oaverhen en dan zeg mar dag teeng die fietse. Begrepen? Lusteren! Det zul ie.”

Een moeder zei det teeng een jochie det vermoedelijk net iets heel naars edoane had, want het dreigement leug d’r niet ömme.

“As ie noe niet ophoalt met jengelen, goa ik dit hele verhaal straks teeng oe va vertellen,” zei een moeder teeng zoonlief die direct buten de supermarkt van de zak met kerskransies wol snupen die moeders net ekocht had.

…Oe va det verhaal vertellen…, wat zol va doar met doene? Ik zol zeng: “kerskransies bent d’r vöar öm op te etten, dus kom mar op met die zak, loate wie d’r gelieke an beginnen.” Mar mien theewater zei det de ‘va’ van het jochie anders oaver kerskransies denkt. Of eigenlijk det die va hillemoal niet denkt. Ik zag mear een va met een biertie in de hand, onderuut gezakt vöar de tillevisie noar een onzin-voetbalwedstrijd op Eurosport kieken en bie hoge uutzondering bereid was uut die hangpositie te komm: öm zien zunne een klabatse an de kop te gee’m.

Het werken: het jengelen was direct of elopen. Bie de kerskransies-sjacheraar tenminsten. Bie het jochie met het fietsie niet. Die bleef döardrammen. Dus ik zeg teeng moeders: “En noe? Fietse op de rails? Zal ik eam helpen?”

Vöarige moand hef het kabinet een plan gelanceerd det d’r allenig nog mar academici vöar de klasse meung stoane op vwo-schoelen. En earder al is bedacht det iedere docent minstens één niveau slimmer dan de student mut weane. Wat nog lastig is op het hoogste niveau, want ooit kan het niet slimmer. Wie d’r dan nog lesse mut gee’m…

In ons land is alles goed geregeld. Een schoelmeister mut bekwaam weane. Wichter leart al op hun derde leazen en schriem. Op middelbare schoelen is het systeem vol ebouwd met keuzes. Wie hebt honderden HBO-opleidingen. Alles is tut in de puntjes eregeld.

Mar ik heb de indruk det wie ien stappie verget. Oaveral mut ie vöar opgeleid weane. Behalve vöar het olderschap. Iederiene kan zo mar wichter op de wereld zetten. Ie hoeft d’r niks vöar te kunn. En det wie d’r niks van kunt, det maak ik dagelijks met.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.