‘Den kjel vrög ‘t meanse of e stoete bie zich hef vöar de wichter’. Wie die zinne goed kon vertalen, kreeg van mie een mooi columnbuukie van miezelf, had ik dree wekke terugge beloafd.
Ik mos d’r wear an denken toen de koning himself ok an het uutdelen sloeg. Gelieke heel Nederland kreeg een boek van hem. Doar kan ik allenig mar van dreum’.
‘De man vraagt aan zijn vrouw of ze brood bij zich heeft voor de kinderen’, schreef Jan Leenhouts mie. Hij was de anstichter van de priesvroage en giet dus met de pries an de haal. ‘Niet zo moeilijk toch?’ zeg Jan, en hij wul d’r ok nog een stukkie oaver schrie’m in het dialectblad Kruudmoes. Dus iederiene gelukkig.
Ik kreeg nog een oplossing. Van Anna Bosman: “Jawel, een echte prijsvraag uitgeschreven door de enige echte Denne van Knöldert. Hier heb ik al jaren naar uitgekeken.” Zie schrif det ze met plezier mien stukkies least. “De snelle verbanden die hij legt”, doar hölt Anna van: “ook al lijken die verbanden soms onlogisch en onnavolgbaar…”
Ik hoppe det mien leraars van de middelbare schoele dit least, want die snappen van die snelle verbanden nooit niks. Zei de meister oaver een parkearverbod vöar vrachtwaangs in de stroate: “want anders kun je niet naar buiten kijken.” Woarop ik zei det ie in zo’n geval wel noar buten kunt kieken, mar det ie dan teeng een vrachtwaang ankiekt. Snappen e niet.
Anna wul de pries persoonlijk uutereikt krieng van mie. Want zie vindt mie onzichtbaar: “Schrijft mooi, daarbij zijn eigen naam niet noemen en als klap op de vuurpijl een bewust onduidelijke foto. Om Denne van Knöldert in het echt te ontmoeten zal ik toch een oplossing moeten toesturen. Op de site, waar ik de oplossing volgens Denne van Knöldert naar toe kan sturen, kan ik niets vinden, wederom blijft het vaag.”
Anna toch, kiek dan toch wat better uut oe doppen. Mien column stiet iedere wekke op de site, niet allenig in de kraante. En op die site kun ie reageren onder de column. Zo makkelijk kan het weane.
Mar goed, ik wul oe het buukie graag persoonlijk oaverhandigen, doar niet van. Wannear zulle wie woar ofsprekken, vroage wie Jan Leenhouts d’r metiene bie. En een fotograaf. Zet op de site onder dit stukkie mar wannear het oe uut kump.
En waart oe, ik doe d’r ok een kussie bie.
Denne van Knöldert.