Ik weet nie hoe ule det hebt, mar ik ben de droad kwiet met pasta’s. Macaroni en spaghetti, det heb ik van thuus met ekreeng. Earst dach ik det riest ok bie de pasta’s höaren. D’r waren jappel of d’r was pasta. Mar det bleek verkeard.
Lest kreeg ik noedels, ik at det in Rusland. Typisch Russisch? Nee, ik was op bezuuk bie een Rus die gek was op Italië… Noedels, det bleek ok pasta. En vermicelli ok al. Höart det dan niet in de soep? Kan, hoef nie. Ravioli is ok pasta, net as penne, lasagne, tagliatelle en totellini. Tja, pasta is dus gewoon deegwaar en gek genog is de ons bekendste pasta macaroni agis gin bekende Italiaanse pasta.
Zeg het mar.
Ik zög mie die pastakennis op, noadet wie op vakantie een panini besteld hadden. Ik zeg teeng de ober ‘panin-ie of panin-ik’, mar die Italiaan snappen det niet. Hij zeg ‘pani-nie of of pani-wel’. Ik zeg, vöaruit dan mar. Mar met fruit d’r bie verkoch e niet.
Het is nog heel ingewikkeld oe verstoanbaar te maken in Italië.
Panini, het is gewoon een stukkie brood, as sandwich op ediend, mar dan in Italië. “Zo hebben wie det wel mer,” zei de ober en kwam met pasta op de proppen.
Eigenlijk is det heel lastig, det wie hier in Nederland van alles wat d’r in de wereld te etten is, in onze eigen supermarkten ok wel varianten hebt ling. Ik weet det det vanwege onze volskaard kump. Bie bent een dienstverlenend döarvoerland en dan kun ie het beste mar van alle markten een bittie thuus weane.
Mar het is lastig, ömdet ik in het butenland altied graag van de lokale keuken magge pruu’m. Ik ben niet zo’n man van een mud jappel met in de caravan. In Turkije at ik een Doner Kebap, in Viëtnam een loempia, in Italië pizza en in China ging ik noar de Chinees. Niks an.
In Rusland beuden ze mie noa de noedels blini’s met smitana an. Kiek, noe begint het eans op te lieken, dach ik. Kreeg ik pannekoek met zure room.
In het Anapurna-gebergte van Nepal dach ik dan eindelijk verre genog weg te weane öm echt ander etten te krieg. Of ik een bördtie dalbat wolle heam. Kom d’r mar met vöar de droad, dach ik. Vol spanning wachen ik of.
Eam later zat ik an de stamppot andivie.
Denne van Knöldert