Home / archiefcentraal / denne van knoldert gin 18 mear 4

denne van knoldert gin 18 mear 4

“Ja, noe weet wule het wel”, höar ik oe zeng. “Det ie zo dom waren van een rots in zee te springen met een slaplaesie tut gevolg. Eigen schuld dikke bult.”

Mar ie hebt het verhaal van de operatie nog tegoed. “Ja, wel een kijkoperatie, mar nee, gin plaatselijke verdoving. Ie goat hillemoal vot. Sterker nog: wie doet oe d’r een dubbele dosis van, want het wul oe knap zear goan doene,” zei de behandeld arts.

Kiek, det bent nog ‘ns geruststellende teksten.

“En wie begint met de blokverdoving, wie legt oe de hele scholder plat vöar de kommende twaalf uur, zodet ie d’r vannacht wat minder last van hebt.” Ik rekkende snel uut det ik dan vannacht öm een uur of 03.00 wel wakker zolle wönn van de piene, mar ik weet niet zeker of die rekkensomme goed was, want iniens vulen ik een zwoare pienscheut.

“Ik weet niet of ie mie an het verdoven bent, mar het wördt d’r niet better op,” bracht ik de anesthesist op de heugte.

“As het zear dut is het goed,” kreeg ik terugge, “want die verdoving mut in de zenuw, die heb ik bliekbaar te pakken.”

Slagers, det bint het. Völle mear kon ik d’r niet van vinn’, want zie leupen wat achter op schema. Ik kreeg de werkinstructie “nog tien tellen, dan zuurstof in luchtpijp en stabiel zijwaards leggen” nog met, mar toen ik de oong wear open deud, keek mie een lieve zuster an die zei: “’t Is ollemoal goed egoane.”

En ik vulen hillemoal niks. “Det kump nog wel,” zei diezelfde zuster. En uut vöarzörg kreeg ik allerlei pijnstillers. Ok een prik teeng trombose, want det deu’n ze altied. En as ik vannacht teeng 03.00 uur die leste Diclofenac slikken, mos ik ok mar een maagwandbeschermer d’r bie nemm’. Welkom in de wereld woar ze zegt det ze oe better maakt.

“En as ik die niet slikke?”

“Det goa ie vannacht graag doene.”

“Ik springe nog liever van een rots in zee, dan det ik die rommel van oe ollemoal slikke.”

“Wie zult ’t ziene, ie bint gin 18 mear.”

Nee, ik ben drie kear zo old. En drie kear zo eigenwies. Dus disse jongen hef de pielstillers niet eslikt. Die heb ik stiekem met esmokkeld. Zie zit in mien sporttasse. Ik hoppe det ik ze volgende wekke niet neudig hebbe bie de earste volleybaltraining.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.