Home / archiefcentraal / denne van knoldert voarname

denne van knoldert voarname

“Ik heb toch liever det ie mie bie de achtername nuumt.” Det zei een vroggere burgemeester een kear teang mie. Ik zeg: “dan ben ie protestants zeker.” Det kloppen, “mar wrum denk ie det dan?” “Nou, katholieken gebruukt wat makkelijker vöarnamen. Die zegt toch ok niet menear Van Nazareth?”

“Jezus, wat is det noe wear vöar een opmerking”, zei de burgemeester. Ik zeg: “Precies, gewoon allenig de vöarname.”

Het bottert vake niet zo tussen mie en de burgemeester. Ik heb het niet zo op zo’n ongekozen man die de baas spölt in een gemeente, mar bie dissent had ik het van of toen verprutst. (Ik heb döarumme nog smaakvol stoan genieten toen hij op het landelijke CDA-congres ofging as een gieter met zien rooje en blauwe kaarten. Jammer det zien partieje toen ging heulen met de fascisten.)

Protestantsen en katholieken, vrogger kreeg ie die niet met mekare an de slag. Zie haa’n eigen voetbalclubs, eigen schoelen, eigen vakbonden, eigen omroepen en eigen politieke partiejen. Det was vrogger. Mar het is volgens mie noe nog steeds zo. Ik heb op Windesheim ewerkt wat gristelijk is. En noe werk ik op Saxion det officieel gin geleuf anhangt, mar de sfeer is katholiek. Het verschil zit ‘m vöaral in min of mear vrolijk in het leam stoane. Calvinistisch teengoaver Bourgondisch, learen ik vöarige wekke in 1 tegen 100, woarbie ik de indruk hadde det Carolien Tensen d’r zelf niks van snappen.

Protestants is anders dan katholiek. PvdA is anders dan VVD. Ik kom net van een journalistencongres en learen det krantenmakers en radiomakers ok ander volk is. Ik vind die constatearing belangriek, ömdet de politiek de samenleving dwingt samen te werken. D’r mut bezunigd wönn en wul ie gemeenschapsgeld vöar een mooi plannegie binnenharken, dan mut ie kunnen bewiezen det andere partijen met oe meewerkt. “Breed draagvlak”, nuumt ze det.

Nou, en doar giet het mis. De katholieke lokale omroep van het iene dorp giet doodleuk een samenwerking an met de protestantse club van een dorp verder. De pdva-wielrenners verbindt zich met de vvd-atlethiekclub en de grune bijenholders goat het verbond an met monoculturele boeren.

Op het oog lik det ollemoal mooi. De oaverheid geef dus subsidie. Mar in de praktijk werkt het niet. Nee, samenwerken mut vanzelf ontstoane, as de oaverheid het onder druk van geld opleg, telt allenig de schone schijn.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.