Home / archiefcentraal / denne van knoldert kieften

denne van knoldert kieften

3S is de kieften kwiet, las ik van de wekke as reactie onder mien column op de site. Of ik doar mien pijlen een kear op konne richten. Noe hoalt mie de weidevolels al langer bezig, dus ja, vrie bane vöar de kieften.

Kieften bent kieviten. Mar det maakt niet uut as ze d’r toch niet mear bent. Net as det ik van de wekke an een hoog Houtens iemand ietleng wat een schearensliep was. Die bent d’r ok niet mear. Wat d’r nog wel is – en döarumme kwamen wule op de schearensliep – is geboefte det ie as boer liever niet op het erf hebt. De schearensliep heulp oe van een botte scheare of, mar het kon zo mar weane, det e oe van nog völle mear ofheult.

Een schearensliep hebt boeren liever niet op het land. Mar weidevogels dan? Ik weet het niet zeker. Vanuut het oogpunt van natuurliefhebberieje zol ie denken van wel. Mar ik betwiefel hoe welkom de weidevogel echt is.

De provincie Oaveriessel gaf töt vöar kort geld an boeren die nesten van weidevogels markearen en d’r dan met het grös meijen netties ömmer-hen ree’n. Doar waren boeren gek op, op die subsidie. Mar de trekkers woarmee ze het land op goat wördt steeds groter, het meij-seizoen steeds langer. Pierties zit d’r dan op een gegeven moment niet mear in de grond en as ze d’r wel zaten komt ze niet mear döar die muurvast gereden boa’mloage hen.

Dan kun ie een nöst van de kievit wel ebschermen, as ie ‘m niks te vretten geeft kump e oe op een gegeven moment niet mear terugge. Det is op het niveau van ‘hef de boer zien peard net zo verre det e niet mear wat te etten hoef, giet ‘m det beest dood’.

Want hoe liefdevol is de boer noe eigenlijk nog met zien platteland? Hij spuit de maïs met gif, injecteart de mest ömdet anders de ammoniak in de lucht kump (noe dus in de grond), ridt op een trekker die mear een fabriek op wielen is en dut an monoteelt in plaatsen van gewaswisseling.

Vöar een boer is zien land eigenlijk industrieterrein ewönn. En de oaverheid is het doar hillemoal met iens. Det kun ie ok wel ziene an de biehöarende fabrieksstallen die ze d’r bie meung bouwen.

Tja, det een kiefte dan eans aans zien heil zöch, ik begriep det wel.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.