Olderenwerk
Toen ik in de joaren tachtig stage liepe vöar het buurt- en clubhuuswerk, had ik te maken met de stichting Olderenwerk. Iederiene die 50 joar of older was beuden wie wat an. Kaarten, dansen, bloemstukkies maken en mear van det soart zaken van ‘wat mut ik anders dan?’
Ik ben noe zelf 50 joar en nog wat d’r bie en toen lag d’r van de wekke het neeje programma vöar 2013 töt en met nota biene 2015 in de busse. Van de stichting Olderenwerk…
Tieden verandert.
In de joaren tachtig ging ie met vervrogd pensioen as ie 50+ was. Noe wielrent 50+-ers harder oaver de Lemelerberg dan de jeugd van teengwoardig. En dan nemt ze de Holterberg d’r nog eam bie. Hen en terugge. Want dan hoef ie het niet te he’mm oaver wukke kante het zwoarste is.
Mar het olderenwerk hef zich niet an’epast.
Zo kan ik – las ik het buukie – as 50+-er gebruuk maken de klussendienst vöar as ik de computer hebbe. Nou, ik kan oe verklappen det ik nog döar de tillefoon hen de computer van mien oale luu kanne reparearen. “Heb ie de stekker d’r dan wel in zitten?” is vake al genog. Mar det doe ik natuurlijk niet. Want anders loop ik de koffie met een lekker plakkie zelfgebakken cake mis.
Ik kanne via het bejaardentehuus ok een internetcursus volgen. Doar heb ik allenig gin tied vöar ömdet ik döar de wekke lesse geve an studenten in het zinnig zuken op internet.
Woar ik wel interesse in hebbe, is in de moaltiedservice. Vöar as het mien kok-böarte is thuus. Mar as ik dan leaze det ik een smearige magnetron-maaltijd ge-aviseard kriege die noa het kokken earst in evröaren is, woardöar smaak, vitamines, voedingstoffen en uterlijk van det kwakkie bewaard blif, dan wördt disse oale man kwoad. Ik loat mie niet vöarlieng döar die jongens en meisies van de stichting olderen. Ik ette liever zonder straling van de magnetron.
Sporten, biedt ze mie ok an. Koersbal. Zollen d’r ooit oale luu ewest weane van nog gin 53 joar die zich doar vöar inschreem? Of det die zich anmeldt vöar het olderenkoar? Noar de soos ‘de derde jeugd’ goat?… Derde jeugd? Ik ben verdullemies nog in stoat een twidde leg te veroorzaken, loat ze oppassen die zusterties in het verzörgingstehuus.
Denne van Knöldert