Home / archiefcentraal / denne van knoldert gif

denne van knoldert gif

Ik ben een bittie in de warre. Het kan döar de Ribs en Blues komm, misschien heb ik doar wat te völle an de geestverruiming edoane. Ik raken in de warre, toen ik lasse det Onno Hoes mear politie wul en krig in verband met drugsrunners die zien Maastricht onveilig maakt. Vöar invoering van de wietpas waren d’r gin drugsrunners ömdet ie in de coffeeshop terechte kon. Noa de wietpas bent d’r iniens drugsrunners die concurreart met de coffeeshops… Ik geleuve Onno niet.

Onno Hoes is de homoseksuele burgemeester van Maastricht die getrouwd is met roddelkoning Albert Verlinden. Wat waren die twee blie det det kon in ons land, homo’s die meung trouwen. Is zo’n Onno Die Hoes is dus ervaringsdeskundige in illegale dingen legaal zien wönn. De juuste man öm te strijden vöar legalisering van drugs, dunt mie. As e det deud, kon e politie inleaveren in plaatsen van politie d’r bie vroang. Want drugsoaverlast is gin oaverlast van gebrukers (zoals bie drank), mar oaverlast van handelaren, een lucratief beroep in verband met de illegaliteit.

Ik ben ok in de warre van die massale zuuktocht noar de twee vermoarde jochies uut Zeist. Geweldig, die inzet van vriewilligers. Zoiets mut ze in de zorg ok probearen te mobilisearen, det niet de oaverheid verantwoardelijk is vöar dagvermaak van onze oaldere mensen, mar det wie det as vriewilligers oppakt. Of det d’r iedere zoaterdag massaal vriewilligers bie de poarten van sportclubs stoat vöar hand en spandiensten.

Het meeste ben ik nog in de warre van gifgebruuk. D’r bent anwiezingen det ze in Syrië gif gebruukt hebt teeng mensen. Dezelfde dag las ik det subsidies vöar agrarisch natuurbehear op een ‘groot fiasco’ uut is elopen. Boeren zollen de natuur beheren, mar zie hebt gif beheard. Zo völle, det Europa al wear een neej gif hef verboden, öm bijen een oaverleavingskans te gee’m.

As Syrië gif gebruukt, is de wereld te klein, as een boer gif gebruukt klimt de land- en tuinbouworganisatie in de penne öm te zeng det de boer ok völle goeds dut. En zie nemt een vöarzitter an die in een asbest-rechtzaak verwikkeld is.

De Europese Commissie verbiedt met onmiddelijke ingang drie vöar bijen dodelijke bestrijdingsmiddelen. Dan blieft d’r nog vier onmiddellijk fatale pesticiden oaver. Ik vind det een gifanval op de bij, dus op de productie van appels en pearen. Syrië is erg. Mar dit dan?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.