Home / archiefcentraal / denne van knoldert cannabis

denne van knoldert cannabis

Ik ben teletekstverslaafd, soms wel vier of zes kear per dag kiek ik teletekst of. ’s Monns as ik uut bedde komme, geliek eam weten of d’r vannacht nog wear eans een giftrein ontploft is, kieken of ze 15 groaden in mei objectief normaal of subjectief smearig koald vindt. In de middag eam weten of ze Thatcher durft of te spiegelen as een intens naar mens, of det ze d’r toch netties met hen doet.

Vanof 104 het Nederlandse nieuws, vanof 125 het internationale verhaal. Op 801 voetbal, vanof 601 de andere sport wat mie al minder interesseart en dan de 400-pagina’s woar ie kunt leazen det ze doar de stagiaires an het werk hebt.

Vervolgens noar RTL die Nederlands en butenlands neejs döar mekare dut, die de drempel vöar neejs ok volle mear bie de burger nearleg. Niet zozear wat politici onder mekare interessant vindt, mar wat wie as burgers wult weten.

Töt slot RTV Oost öm oaver ongevallegies in Twente te leazen.

Lest werd ik wear heerlijk bevestigd in mien verslaving. Een kind van 3 was van 6 hoge van een flat egooid. Hij had het niet oaverleafd. De politie slöt een misdaad niet uut. Een vrouw en twee mannen bent an ehoalen. Íen vrouw, twee mannen, ie hebt d’r zo mar een heel verhaal van in de kop. Een pagina verder las ik det de Nederlandse wichter het gelukkigst bent van heel Europa.

Ja, as ie de ongelukkige wichter van de flat of gooit, kan ik het ok wel.

De metlatte vöar geluk vund ik interessant. Het earste criterium ging oaver welvaart, rijkdom, spölgoed. Oh, wat haa’n oonze wichter het goed op det vlak. Mar ik had in ‘de markt van welzijn en geluk’ van ’s lands filosoof Achterhuis toch eleazen det geluk gin welváárt, mar juust welzíjn is? Ik heb in Nepal ezene hoe gelukkig wichter doar waren met een lekke fietsbaand as hoepel, die rollen ze me een takkie voart oaver een zandweg die wie hier al lange geasfalteard zollen he’mm. Schik det die wichter haa’n!

Nederlandse wichter deun het mar op íen punt niet het beste van alle Europese landen. Det was op het gebruuk van cannabis. En wat mie noe bezig hölt vanof det ik det bericht leaze: doet ze het niet zo best ömdet ze doar te völle van gebruukt? Of ömdet ze d’r te weinig van gebruukt.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.