Telefoongesprek:
Hij: “Zeg, ik heb die puzzel noe op elost, ule zegt det ik het antwoard mutte inzenden via de site. Mar ik heb gin internet…”
Ikke: “Dus ie bent die Nederlander die niet an eslötten is op het world wide web. Proficiat. Wat leuk det ik de ear hebbe oe an de lijn te krieng…”
Wule haa’n net een huus an huus-magazine uut ebracht met een puzzel d’r in, woarvan ze de oplossing mossen invullen op onze site. Zogenaamd ömdet det postzegels schelt, mar eigenlijk ömdet wie dan lekker völle volk op de site kriegt.
Hij: “Ja det zal ollemoal wel, mar hoe krieg ik det antwoard noe bie ule?”
Ikke: “Hebt de buren dan gin internet.”
Hij: “Jewel, mar die werkt allebei. Ik wulle ze niet iedere kear stoaren. Wule kunt wieders wel goed met mekare höar, doar niet van, mar die hebt het druk zat öm dan ok nog ‘ns een kear die puzzeloplossing via die site van ule in te vullen.”
Ikke: “Ja, en as ie dan zollen winnen, det hun dan met de pries d’r van döar goat.”
Hij: “Zol det? Nee, zukke luu bent het niet. Wie hebt d’r goeje buren an.”
Korte stilte. Hij hef een probleem, dus ik hoef het gesprek niet op gang te hoalen.
Hij pakken de droad wear op: “Mar alle gekheid op een stökkie. Hoe krieg ik die oplossing bie ule?”
Ikke: “Via de post dan mar?”
Hij: “Een ansichtkaarte?”
Ikke: “Ja, lik mie leuk. Met de groeten uut… Woar kom ie eigenlijk vandan?”
Hij: “Bearzeveld.”
Ikke: “Dan is het nog biezunder det de buren wél internet hebt.”
Hij: “’t Bent goeje buren.”
Ikke: “Doe mie dan mar een ansichtkaarte met de groeten uut Ommen.”
Hij: “As ie eam wacht dan hef mien vrouw penne en papier. Gif het adres mar.”
Ikke: “Boeierstraat 10 in Roalte.”
Hij: “Boeierstraat. Wat vöar nummer?”
Ikke: “Tiene, in Roalte.”
Hij: “Tiene, in wukke plaatse?”
Ikke: “Roalte.”
Hij: “Ja, ie mut weten, mien vrouw schrif niet zo snel mear…”
Een heel gewoon gesprek, twintig joar elene. Het kwam mie raar oaver toen in het vöarige wekke voeren. Gisteren kreeg ik de ansichtkaarte in de busse. Det was mie al gin dree joar mear geböard. Een mooie kaarte, Ommen, een plekkie vöar de vakantie? Zwierige letters ok, zoas die bienoa niet mear eschree’m wöardt.
Jammer det het antwoard fout was.
Denne van Knöldert.