Home / archiefcentraal / denne van knoldert ontzag

denne van knoldert ontzag

Vrogger zei ik teeng mien vriendties: as oe olders oe zulke rare regels oplegt, dan luster ie d’r toch niet noar? Rare regels mut ie niet gehoorzamen, lear ik de wichter noe.

Noe mut ik zeng det mien vriendties en ikke goeie olders haa’n. Wie mossen allenig iedere wekke noar de kerke. Toppunt was op een 1 januari toen mien moat öm 07.00 uur thuus kwam en zien va van onder de koeien zei: “det is kukenachtig late, mar mooi op tied öm de vrogmisse van half achte met te pakken…

Rare regels mut ie niet gehoarzamen. En döarumme is d’r zo weinig gezag noar de oaverheid en andere grote instanties. Meestal bent ze öm uut te lachen.

Zo kreeg ik lest een bekeuing ömdet ik een zestig kilometer per uur riedende auto tussen Zwolle en Roalte inhalen oaver een döargetrökken streep. De politie gaf as argument det ik de man wel heel erg hard an het schrikken had kunnen brengen. Mar de politie had precies hetzelfde doane. “Mar wule riedt veilig, wule bent beroeps”, zei de politie. Mien verwear: “Mar ík heb nog nooit een fuik op en snelweg uutezet vöar een benzinedief van vieftig euro, woardöar d’r dooien vielen.”

Dan wul het gezag iniens ontzag.

Ik heb de bekeuring netties betaald. Mar ik heb justitie ok evroagd of de politie zonder sirene en zwaailicht wel zo gevoarlijk mog inhalen. Ik kreeg een brief terugge det ik bezwoar had an etekend teeng de bekeuring en det ik tut behandeling niet hoe’m te betalen. Det vöarspellen weinig goeds, want ik had gin bezwoar an etekend. Drie moand noa mien bezwoar en acht justitie-manuren verder was het antwoard: Ik had niet meung inhalen. Wel een antwoard, mar niet op mien vroage.

Van de wekke mear van det soort brieven. Een betalingsanmaning van Zilveren Kruus terwijl ik d’r gin verzekering mear hebbe. Een ICT-nota vöar een verkeard bedrief. Een tandartsnota vöar werk det nog mut geböaren, een spooknota vöar een nooit gevroagde advertentie.

Van het waterschap vroagt ze mie ieder joar of ik de vaste lasten via een machtiging wulle betalen, mar ik kieke wel uut. Ik vertrouw de instellingen niet mear die hun zaakies via computersystemen en digid regelt. Zie verandert voortdurend regelties, hebt doar zelf gin zicht op en loat het werk uutvoeren döar niet betrokken goedkope krachten. En wie bent an de Goden oaver eleaverd?

Ik leare het jongvolk doar nooit ontzag vöar te hebben.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.