Home / archiefcentraal / denne van knoldert lichte afwijking

denne van knoldert lichte afwijking

Ik had mie op de markt een lekkere zak nötten ekocht vöar de zoaterdagoamd, mar ’s middags an de thee zat ik d’r al van de snaaien. Cashewnötten, walnötten en cranberrys had ik mie bie de kroam an loaten proaten. “ Een heerlijke mix”, wus de marktkoopman mie te oavertugen.

Een bittie keuvelend met mien vrouw, knabbelen ik de neuties lekker weg. Op een gegeven moment betrappen ik mie d’r op det ik heel secuur an het verdelen wasse. Op mien hand lagen twee cashewnötten en een walnötte, op alle drie lag en cranberry. Eerst een cashew-cranberrymix, sprak ik met mie zelf of. Dan heel döardringend pruven hoe lekker det is. En vervolgens besluten wulke van de twee resterende combinaties ik as leste zolle bewaren.

“Luuster ie wel?” vreug mien vrouw?

“Uh, woarnoa?”

Nee dus, ik was hillemoal in gedachten verzunken.

Zoaterdagoamd waren de nötten op, dus had ik tied oaver öm ‘ns goed noa te denken oaver het vöarval van die middag. In plaatsen van te goan twiefelen an mie zelf, bedach ik met een soart gevuul van tevredenheid det ik mie zelf heel vake teeng kwam in het maken van zulke keuzes.

Ik bewaar het lekkerste altied tut het leste. Dan et ik earst de sloa op, doarnoa de gedreugde tomaten die licht gebakken bent in olijfölie, dan pas as leste de blökkies fetta. Van een wafelijssie bewaar ik altied zo völle mogelijk wafel vöar de leste hap. En van appelgebak vind ik de rugge en de bodem zo lekker, det ik earst de rest op ette.

D’r bent d’r mear die det doet. Ik höaren d’r lest iene die een sigarette roken vöar de seks.

“Gek”, vund een moat. Hij at het lekkerste altied as earste, “want dan is de honger het grootst, dus het genot ok.” Gin gekke redernatie. Hij had det ok met wielrennen. Ik fietse mien röndie altied earst teeng de wind in, zodet het terugge noar huus mooi met valt. Mien moat begint van de wind of “ömdet ik dan altied te verre weg fietse en zo conditie opbouw vanwege die rotwind.”

Det maken mie heel nieuwsgierig of hij de cashew- of walnoot as earste op zol etten met de cranberry . Hij zeg: “samen opetten? Det is toch hartstikke smearig?” En hij had nog gelieke ok.

Ik heb Google mien vroage ok vöar elegd. Het antwoord: “lichte afwijking in het autistisch spectrum.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.