Home / archiefcentraal / denne van knoldert rauw

denne van knoldert rauw

Een moeder gif haar zoon allenig mar rauw voedsel. Heel Nederland vindt det die moeder een halt toe eroepen mut wönn. Ikke niet.

Ik kwam lest twee konienties teeng bie mie in de gruuntetuin. Zie hadden ok een klein knientie bie zich. Mamma konien wol het jonkie een wortel gee’m en ik kan oe verklappen det de wortels uut de gruuntetuin van mien vrouw lekker bent. Mar det moch niet van pappa konien. Die vund det de wortel earst ekokt mos wönn…

Rauw voedsel is vöar die beessies heel gezond. Wat mannegie konien ollemoal kloar maak, die lust d’r wel pap van. Ik kan det vanuut het keukenraam iedere kear goed ziene. En as het vöar die beessies goed is… Bent wie eigenlijk ok niet gewoon dieren?

Hoe verre wie van de basis bent weg edreven bleek mie, toen ik lest met een kammeroad in de stad wasse. Wie haa’n honger. Ik stellen vöar twee bolletjes muesli te kopen vöar de pries van een. “Te gezond”, vund mien moat en hij koch een worstebroodje. ‘Lekker’ is bliekbaar niet de maatstaaf, mar ‘gezond’, woarbie ‘gezond’ ofstoot en ongezond antrekt. Mien maatstaaf blif ‘lekker’ en dan vind ik een mueslibol völle lekkerder.

Mar goed, as die moeder verboden wördt haar kind allenig mar rauw etten te gee’m, dan wul ik graag det d’r mear verboden komt. Moeders die hun wichter patat met mayonaise geeft, mut ok een verbod krieng. Kip met antibiotica mag ok niet mear. En moeders die rookt en drinkt tijdens de zwangerschap, ok in de ban. Cola en sinas, gevulde koeken, chips en snoep? Schande, doar mossen ze een documentaire van maken. Moeders die hun kinderen alcohol geeft as ze nog gin – loat ik schappelijk weane – 16 joar bent? Een bekeuring.

Och, as wie dan toch bezig bent, ok vaders die bumper kleeft met een kind op de achterbanke, vaders die langs de lijn de scheids uut scheldt as zoonlief in het veld stiet, die op vriedag an’eschötten van het werk thuus kump. Ollemoal verbieden.

En iederiene die sowieso an de kinderen wul, earst een diploma ‘opvoeden’ volgen. Want in dit land mut alles met een diploma, behalve het oalderschap.

En zelf et ik in januari allenig mar rauw. Ik heb zo völle bier en oliebol egetten, det mien mage töt februari an de kok is.

Een gezond 2013.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.