Home / archiefcentraal / denne van knoldert rare wetten

denne van knoldert rare wetten

Terwijl ons kabinet in zee ging met de Italiaanse treinenbouwer Fyra die te koop stiet mar niemand wul het hemm wegens een miljoenenschuld, tekent Dalfsen een advertentiecontract met een bedrief met miljoenenverlies det te koop stiet.

Besluutvorming kan soms vremde vormen annemmen. De gemeenteroad van een Spaans kustplaatsie besleut ooit, verre noa middernacht, det allenig vrouwen met mooie borsten topless op het strand meung. Ik ben nog joaren op zuuk ewest noar det plaatsie.

In de vroggere gemeente Heino kenden ze die tactiek niet. Zie sloegen doar het twidde köppie koffie oaver, want die kreeg ie niet op vöar het eind van de vergadering.

In Amerika, het land woar iederiene een wapen hef, öm de man dood te schieten die oe wul dood schieten, hebt ze ok heel rare regels. Vöaral op zundag (en steeds in andere staten). Noa zunsondergang pinda’s verkopen, ongetrouwde vrouwen die parachute springt, een ijsbeker in de broekzak, ömhoog kieken as ie poept… op zundag verboden. Ik heb det leste probeart (niet op zundag) en ik kan oe vertellen, het is best wel prettig.

As ie in South Dakota vief Indianen op oe terrein hebt, mag ie ze dood schieten. Det dan wear wel. En in South Carolina mag ie op zundag oe vrouw sloane op de trappen van de rechtbank.

In Alabama is het verboden oe vöar te doene as een geestelijke. Met de kennis van noe is det zo’n gekke regel nog nie… In Florida mag ie gin seks hemm met een stekkelvarken. Ik zol doar in Alabama ok ‘ns oaver noadenken.

In Arkansas is het verboden een stroatname verkeard uut te sprekken. Met mien Engels loop ik doar dus groot gevoar. Dus mut mien vrouw doar de weg mar vroang, dan komt wie niet woar wie weane mut, mar het is wel veiliger.

Ie mag in det gekke Amerika ok niks. Alligators in de badkuip, kamelenjacht, mear dan twee dildo’s, snurken met het raam open, acht vrouwen in huus, de grens oaver met een eend op oe hoofd, bier verkopen as de bar niet tegelieke ok verse soep hef, bizons schieten vanof de twidde verdieping van een hotel, met olifanten een katoenveld ploegen, seks in een ambulance op weg noar een noodgeval. Ollemoal verboden.

In Idaho is het verboden te vissen vanof de rug van een kameel. Zit doar gin mooi spel in vöar ien van de zommerfeesten kommend seizoen?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.