Home / archiefcentraal / denne van knoldert plofkippe

denne van knoldert plofkippe

Plofkippe, det is het woard van 2012 ewönn volgens ‘Onze Taal’. Ik vind het een geweldig woard, vöaral as ie het ok in figuurlijke zin gebruukt. ‘Wat ben ie een alderakeligste plofkippe’. Mooi toch?

Plofkippen ploft van kuken noar grote kippe vanwege gevoarlijk krachtvoer. Det giet zo snel det ze döar de peuties zakt ömdet de spieren de gewichtsgruui niet bie kunt benen. De mislukkeling die det bedacht hef, is een plofkop. En wie die kippen op et ok.

In Stegeren bie Ommen kump straks een megastal vöar plofkippen. Wat een domme plofkippen, die doar een vergunning vöar geeft. Mar ik zag op Nieuwsuur hoe die dingen goat. In Frankriek krig een plofkippenfabriek (een miljoen slachtingen per dag) 50 miljoen subsidie per joar öm plofkippen te exporteren noar de Afrikaanse markt, zodet doar de lokale gewone kippen-producenten failliet goat.

(In Roalte stiet d’r een grote fokkerieje vöar 12.500 konienen. Plofkonienen denk ik. Wellicht een tip vöar de redactie van ‘Onze Taal’)

Plofkippen bent ok de bestuurders die van de ofgelopen joarwisseling zeiden det het met geweld en vandalisme wel meeveul en det het minder was dan vöarig joar. Logisch minder, want het reang det het geut. Het schorriemorrie zat snel wear binnen. Mar in de korte tied det ze buten waren, kreeng ze nog flink wat kapot. Dan zeg ie toch niet det het met valt? Dan roep ie iederiene op die d’r bie was, ze te verlinken.

De Amerikaanse politiek zit ok vol plofkippen. Kort vöar de joarwisseling mossen ze beslissen oaver belastingverhoging an miljonairs. Lukken det niet, dan gingen d’r vanzelf allerlei nare belastingmaatregelen in werking. Vanzelf… hoezo vanzelf. Een maatregel dut toch niet iets zich zelf? Gezeur van plofkippen.

Ik heb denk ik ok een plofmolle in de tuin. Die maakt zulke grote bulten det het mie wel een krusing lik met een olifant.

De directeur van Het Rode Kruis is ok een plofkippe. Die man verdient een miljoen per joar. Een op de acht euro’s van Serious Request giet noar hem privé. Ömdet de man zo goed is, mag e zovölle verdienen, zegt ze. Gezöar, d’r bent d’r zat die net zo goed bent, mar vöar völle minder wult werken. Ik denk det die directeur nog wel de grootste plofkippe van het joar is: een serious plofkippie. Volgend joar kriegt ze op hun request gin geld mear van mie.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.