Home / archiefcentraal / denne van knoldert bultrug

denne van knoldert bultrug

Van het padje af, zegt ze wel van iene die niet zo heel normaal mear is. De verslaggevers oaver de Bultrug waren ok wel wat van het padje of. Een vis – een groten, det wel – zwemt op een zandstrand, lig doar een bittie dood te goane en heel Nederland mut doar dan van de hoogte bracht wönn. Zelfs de moardpartieje op een Amerikaanse schoele kon de Bultrug niet verdringen.

Bultrug, bultrug… iniens mos Samsom an Sharon Dijksma mos denken. Bultrug, Dijksma, opvolger Co Verdaas, Economische Zaken… Och, ie mut mar denken det Samsom het heel druk hef. Dan denk en doe ie gekke dingen, dan raak ie wat van het padje, zal ik mar zeng. En dus kump de vleesgeworden mislukking van de oalde PvdA wear noar Den Haag. Dijksma is al politica sinds de kleutertied, hef nooit wat anders edoane dan besturen, kent de gewone maatschappij van ‘proaten oaver’. Dijksma was earder staatssecretaris en maken toen de kinderopvang gratis. Wat is det een döarsloand succes ewönn…

De verkiezing van meest talentvolle politicus van het oflopende joar is ok döar de bultrug beïnvloed. VVD’ster Plasschard wun, twee stemmers haa’n nog op Dijksma estemd, mar die deud niet iens met. Plasschard kreeg een bultrugge toen ze zich uut schaamte zo klein mogelijk probearen te maken op het moment det ze vöar weigerambteren stemmen, terwijl ze teeng was. Zie wol de vrouwenonderdrukkers van de SGP te vriend hoalen en zo het kabinet in het zadel hoalen, det al lange an een ziekante van het peard bungelen.

Heel foute politiek, want zie stund niet achter haar standpunten én zie wol iets onhaalbaars oavereind hoalen. Eigenlijk wel twee goeje karaktertrekken vöar een minister van oarlog, zo iene mut goed kunnen lieng. Plasschard zeg ok det d’r niet mear bezunigd kan wönn op Defensie. Mar det meent ze niet, zie hef een verborgen agenda die wule nog niet kent..

Mar de echte Bultrug is intussen mooi dood egoane. Nico Dijkshoorn zol zeng: “net nog een bittie stoer de grote jongen uuthangen in die zee met af en toe een kapsones-bommetje, en noe lig ie doar. Dood.” Marianne Thieme van de Dierenpartij vindt: ‘gewoon loaten ling, terugge gee’m an de natuur’. Mar een mal onderzoeksbureau Naturalis zeg det d’r mar iene is die det beslist en det bent ze zelf. Een Plasschardje, zulle wie mar zeng.

Wie bent echt een land in crisis.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.