Home / archiefcentraal / denne van knoldert oaverschoene

denne van knoldert oaverschoene

Ik zag een tweet vöarbie komm’ van mien bröar Dissent. Hij had bedacht det as ie de oaverschoene van het wielrennen onder de wielrenschoene doet, det de oaverschoene dan langer goed blieft…

Fenomenaal.

D’r was ien vergeliekbaar vöarbeeld det mie per direct te binnen scheut. Wie haa’n een kear oppas toen de wichter nog in de luierstand stunn’. Bie onze thuuskomst delen de oppas mee det dochterlief as een roos döar esloapen had, noadet ze an het begin van de oamd nog een kear de luier verwisseld had. Ik ging nog eam noar de kinderkamer en tröf doar een verdachte lucht an. Stront an de knikker.

Een onmeunig stinkende poepluier, de poep was namelijk buten de luier terechte raakt. Wat bleek? De oppas had mien dochter earst het rompertje an edoane, en doar oaverhen de luier. Dochterlief had dus gerust wel epoept, mar in haar rompertje. Langzaam mar zeker was de poep binnen de luier döar, noar boa’m etrökken en det gaf dus die lucht in de kinderkamer.

Net as bie wielrenschoene met een oaverschoen d’r in, was de luier ondanks het rompertje ok vies ‘ewönn. Mar een vieze luier kun ie niet eam poetsen en de volgende kear wear antrekken. Sterker nog: het rompertje, de luier (van katoen), het beddegoed: het mos ollemoal in de wasse. Doar benne wie toen nog wel eam druk met ewest. Een dag later is zelfs het matrassie nog noar buten egoane öm de stanklucht d’r uut te loaten weijen.

Het idee van een luier an de konte en dan pas een rompertje d’r oaver hen, is logisch. Herman Finkers zeg het ok: ’s monns earst onder de douche en dan pas de kleare an, niet aans ömme. Mar wat is de logica van die oaverschoen onder de wielrenschoen? Nou, die is d’r wel: de oaverschoen is as een soart handschoen, teeng de koale dus. Een extra paar kousen zol ok kunnen, mar det past vake niet. En kousen loat op ienig moment de wind ok döar.

Dissent kreeg zien tip van fietsenmaker Kökkie. Ik kreeg d’r vrogger iene van fietsenmaker Ahlers: gewoon een plastic zakkie öm de kousen doene en dan oe wielrenschoen an. Warm wördt ie van oe zelf wel. Wind kan niet döar het plastic. Ie hebt dan de oaverschoen hillemoal niet neudig. En dan blieft ze het langst goed.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.