Home / archiefcentraal / denne van knoldert bie de dokter

denne van knoldert bie de dokter

“Kunne wie hier ok basketballen?” vreug zich iemand in de wachtkamer van de dokter of, want boam oons heufd hing een grote basket. Wie haa’n tied zat van proaten, de dokter was weg eroepen noar een spoedgeval. Earst zit ie dan wat teeng mekare an te kieken, langzaam mar zeker ontdooit d’r doarnoa wel wat.

“Ik ben hier vöar te hoge bloeddruk”, zei d’r iene, “en dan is de dokter niet op tied. Doar kan ik slecht teeng.” Nou, die had gin dokter neudig, die mos mear geduld probearen te krieng. Dus íen probleem hadden wie ter plekke al op elost.

Op zuuk noar mear gespreksstof pakken ik de krante die in de wachtruumte lag, die was wel van vandage, mar had toch nieuws van gisteren. In zo’n wachtkamer is det wel handig, want dan hoef ie niet earst met het nieuws bezig, dan kun ie gelieke oe mening d’r oaver kwiet. Zo las ik det Rabobank Salland in Deamter in februari giet verhuzen noar een nieuw pand. “Dan zal de banke in Roalte wel dichte goane”, vöarspellen d’r iene, “want ik kreeg van de wekke een dure brief in huus, wulke extra service de banke giet leaveren. Zie komt geld an huus brengen, en hypotheekgesprekken kunt straks ok thuus an de keukentoafel. Kortom, zie komt an huus en dan kan de banke in Roalte dichte.”

“Ja, dan zal Salland Wonen doar het hele pand wel in beslag goan nemmen. Kunt die lui nog wieder wandelen.” Doar wol ik mear van weten. “Wieder wandelen? Hoe bedoeloe?” “Nou, as ik doar wacht op mien ofspraak loopt d’r de hele tied van die kantoarklerken rond met papier onder de arm. Hen en terugge. Neans noar toe. Mar ollemoal met papier onder de arm.” “Ik denk det ze van beeldscherm noar beeldscherm loopt, öm doar dan wear nieuwe papieren te maken”, bedach die man met een te hoge bloeddruk. “Of det ze tussen het werk döar oefent vöar de wandelvierdaagse?”

D’r veul een korte stilte. En iniens ging het oaver de politie. Oaver onzinbekeuringen vöar net te hard riene, gin gordel draang, bellen in de auto, de hoogte van boetes. Wie waren het wear snel iens: ’t is ollemoal niet vöar de veiligheid, de staat hef ons geld neudig. Oaver ien ding waren wie het snel iens: zie mut iets an bumperkleven doene.

En toen was de dokter wear terugge.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.