Home / archiefcentraal / denne van knoldert niet bekeurd

denne van knoldert niet bekeurd

“Die pet past ons allemaal”, zei ik noar volle tevredenheid noa een goed gesprek met oom agent. Ik had net op een verdrijvingsvlak inehaald, werd drie kilometer verder op stop ezet döar twee vriendelijke agenten en moch noa uutleg oaver mien weggedrag, gewoon wear verder riene.

Het was tussen Zwolle en Roalte det d’r een vrachtwaang vöar mie reed met een gangetie van 60 kilometer per uur. En ik had hoast. Doar achter reden een stuk of twintig auto’s. En dan kwam ik. Ik had tied genog öm op tied op mien ofspraak te ko’mm, mar had niet erekkend op zo’n trage vrachtwaang woarvan zestig dus de maximum snelheid was, niet de kruussnelheid.

Bie de earste mogelijkheid halen een stuk of drie chauffeurs de – noar het dekzeil ter oardelen – oost Europeaan in. Bie de twidde mogelijkheid wear drie. Heel langzaam zag ik det mien kans ging komm. Mar toen ging de chauffeur vöar mie in zien luxe waang iniens nóg zachter. D’r veul zo’n anzienlijk gat det ik an zag ko’mm det ik bie de verkearslichten van Heino gin vöardeel kon krieng van de dubbele riestroken doar, want dan zol die – vast dronken – Pool earder döar de lichten weane, dan ik d’r langs wasse. Dus besleut ik die chauffeurspiloot vöar mie in te halen, oaver een verdrijvingsvak sturend.

Ik oaverweug 112 te bellen vanwege die vrachtwaang, mar tegelieke zag ik een politie in de achteruutkiekspiegel. Die blee’m earst achter de vrachtwaang hangen, bumperkleven toen de chauffeur die ik net achter mie e’loaten hadde en kwamen vervolgens oaver een döargetrokken witte streep achter mie an.

Hun: Of ik wel wusse hoe gevoarlijk ik reed.

Ikke: Of hun wel wussen hoe gevoarlijk hun ree’n.

Hun: Die man in die auto had wel kunnen schrikken.

Ikke: Van ule ja.

Hun:Wule bleem d’r eam achter hangen öm te ziene wat ie ollemoal nog mear an oavertredingen binnen zollen halen.

Ikke: Ik reed verder netties auto volgens de regels, mossen ule ok iens doene.

Hun: Leamsgevoerlijk wat ie doet.

Ikke: Det ule nog gin dodelijke filefuik opzetten öm mie te pakken.

Hun: Doar reageert wule niet op.

Ikke: Ik maak ule d’r op attent det ule gin verklaring hoeft of te leng.

Het resultaat: ik kreeg ging bekeuring en moch gewoon wear verder riene. Prima kerels, toffe gozers. Hoe ze mien 50 euro verdeeld hebt, det zal altied geheim bliem.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.