Home / archiefcentraal / denne van knoldert vergunning

denne van knoldert vergunning

Ik mosse lest een bouwvergunning hemm vöar zunnepanelen. Mar det bestund niet mear, een bouwvergunning. Det leek mie op weg noar minder regels en bemuuizucht van de oaverheid een heel grote stap vöarwaards. Mar ik had het fout. Een bouwvergunning bestiet niet mear. Het heet noe een ömgevingsvergunning.

Ik denke det det net is as met wachtwoarden in het computersysteem van de baas. Öm te vöarkomm det iemand d’r an e’wend raakt, mut het veranderd wönn. Het is goed vöar de werkgelegenheid det een bouwvergunning noe ömgevingsvergunning heet, want gin hond snapt d’r mear iets van en dan komt d’r vroang en goat d’r dinge fout. En det mut döar ambtenaren op’elost wönn.

Oaver zes wekken heb ie antwoard, stund d’r in de brief van bevestiging van ontvangst, zo niet, dan heb ie sowieso oe vergunning. Raar, det het werktempo van de oaverheid ekoppeld wördt an iets det wel of niet mag. Zo belangrijk zal zo’n vergunning dus wel niet weane.

En det was het ok niet, mar wel ingewikkeld. Ik had namelijk met edoane an die subsidieregeling vöar zunnepanelen en die waa’n bie mie niet op het dak, mar op de grond ekomm. Noa twee joar kwam d’r een controleur die wol det ik een extra zunnepanelenvergunning had, want zie zaten niet op het dak. “Nou en?” vreug ik nog, “Regels”, was het antwoard.

Dus ik noar de gemeente. Die was al weazen kieken of mien neeje huus ebouwd was oaverienkomstig de ‘ömgevingsvergunning’, dus is stellen vöar det ze d’r met een potlood eam bie zetten det det ok vöar de zunnepanelen göld, want die stunn toch in de ömgeving? Mar zo waa’n wie niet etrouwd. Zie konn nie zo mar, ömdet een andere oaverheid det wol, mien bouwvergunning vöar het huus verdudelijken.

Dus heb ik een neeje vergunning an evroang vöar de zunnepanelen, woar ik dus al een vergunning vöar hadde. Op zo’n moment besef ie wear det ambtenaren feitelijk bedoeld bent öm het leam van de burgers, vöaral námens die burgers, een bittie te regelen.

Ik heb netties een neeje ömgevingsvergunning in ediend. Iemand hef mie netties een bericht van ontvangst estuurd. De vergunning hef keurig zes wekken ter inzage eleang. Toen ik de vergunning had, heb ik die netties noar de zunnepanelen-controleur op estuurd.

En noe is alles goed. Mar d’r is niks veranderd.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.