Home / archiefcentraal / denne van knoldert inhalen

denne van knoldert inhalen

Inhalen

‘De volgende oproep is om de geluidsinstallatie te testen en kan foutieve informatie bevatten’, höaren ik op het station van Enschede. De geluidsinstallatie deud het dus. Mar dan kwam toch de test: ‘de trein naar Nijverdal vertrekt van spoor 3’.

Lastig, want op de meldingsborden op het perron stund det de trein noar Nijverdal inderdaad vanof spoor 3 vertrekken zol. Mar de informatie die ik net höaren kon foutieve informatie bevatten. Wat te doene?

Ik ben toch mar in de trein goan zitten. Toen die op de werkelijke vertrektied van 15.48 nog steeds niet döar het Twentse landschap reed, ging ik weer twiefelen. Mar de machinist gaf opheldering: ‘U bevindt zich in de trein naar Nijverdal.’ Meestal zegt ze det pas as de trein al ridt, vermoedelijk öm mensen die een verkearde keus emaakt hebt, lekker te loaten schrikken. Mar noe was d’r een goede reden. Zie haa’n wat vertrekvertraging ömdet d’r nog gin conducteur an board was.

‘Gin conducteur? Det kan toch ok wel zonder?’ zeg een reisgenoot.

‘Nee, tuurlijk niet, een busse kan toch ok niet weg zonder buschauffeur?’

Ik heb mie d’r mar niet met bemuuit.

Toen ze ‘m bienoa an etrapt hadden moch earst de sneltrein nog vot en toen gonk het gangs met ons boemeltje. De machinist reup nog iets oaver probearen de verlöaren tied in te halen en excuses, mar as ze noe ergens de geluidsinstallaties meung testen, dan is het wel in treinen, in plaats van op perrons. En die chauffeurspiloot had d’r niet bie ezegd det zien informatie ok foutief kon weane. Want tied in halen? Tergend langzaam reed onze stoptrein van Enschede noar Drienerlo noar Hengelo… ‘Hij is de tied an het inhalen’, snearen een medereiziger, ‘ik hoppe det de conducteur nog kump, dan kunt wie ‘m uutleng hoe as of wie d’r oaver denkt.’

Mar de conducteur kwam niet, wel nog een mededeling: ‘disse trein giet niet verder dan Wierden.’ Hoe ik in Nijverdal mos komm’, zeiden ze d’r niet bie.

Op het winderige perron van Wierden leng de conducteur mie uut det wie inderdaad op haar ewacht hadden. ‘Tja’, zei ze. ‘Tja’ zei ik. Intussen ging onze trein weer terugge Tukkerland in. Het was toen al 16.12 uur. Woarnoa öm 16.13 uur ömmeroepen werd die trein oaver vief minuten zol vertrekken.

Tut de trein noar Nijvedal kwam heb ik dit verhaaltie etypt. De vertraging van een half uur in Nijverdal had ik toen nog vöar de boeg.

Wat verdient de baas van de NS eigenlijk?

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.