Home / archiefcentraal / denne van knoldert curacao 4

denne van knoldert curacao 4

Teengwoardig kun ie oardig zeker weane van genog beenruumte in het vliegtuug. Want de KLM hef ontdekt det doar geld met de verdienen valt. Zeumtig euro extra vroagt ze vöar een stoel bie een nooduutgang.

Mar dan heb ie ok wat. Steenkoale biene ömdat de nooduutgang toch wat tocht. En een stoel woar ik met mien heus niet al te zwoare achterwerk niet gewoon in kon goan zitten. Ik mos op het puntie van de stoel plaatse nemmen en mien heupen dan onder de armleuningen döar drukken. Kort vöar wie opstegen zag de stewardess det ik gin gordel öm had. “Mar ik zit klemvast in disse stoel. Ik kan d’r alleen mar uut as ik recht noar vöaren schoeve.” “Dat is ook juist het gevaar”, was haar tegenwoard. Dus mos ik mie earst uut de stoel wringen, de banden van de gordel boavenop de leuningen leggen, mie wear noar achteren wurmen en toen pas fasten my seatbells.

Dus die extra 70 euro is de muuite wel. Vöaral ok ömdat wie om 8.00 uur vleung en öm 9.00 uur al een ontbijt kregen van geklutst ei, spinazie en gekokte jappel. Mjam, mjam.

Wie hadden een tussenlanding op St. Maarten, mar mochten d‘r doar niet uut. Öm de ien of andere reden is de wereld verdeeld met denkbeeldige lijnties en wul ie oaver zo’n lijntie noar een ander land, dan mut ie een bewies van d’r in en d’r uut he’mm. Mar mien nooduutgang ging open vöar de schoonmaakploeg (werk wat op St. Maarten ok döar donkere meansen edoane wördt). Dus heb ik mie een paar ferme happen Maartense lucht binnen’ehaald. Op St. Maarten, doar ben ik noe ok ‘ewest.

Die hap adem, det vund de rest van het vliegtuig ok wel een goed plan dus werd het wat druk vöar de nooduutgang en det vonden de schoonmakers niet leuk. Het duren mar eam of de baas van de stewardessen – meestal een homoseksuele purser – vroeg via de intercom of wie wollen goan zitten. Mien stewardess vund det det niet snel genog ging en begon, oaver de intercom hen, ok haar orders te gee’m. Doar hoal ik niet van, wie waren toch niet op weg naar Dachau of zo? Dus ik bleef demonstratief stoan. “En jij daar, ook zitten. Heb je de intercom niet gehoord?” “Nee, doar stund ie tussendöar te blearen.”

Ik mut zeggen det dan zo’n reststuk van de reis naar Curaçao nog flink lang kan duren…

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.