Kippen bent rare beesten. Heel rare beesten. Toen ik as klein kjeltie bie tante Knöldert logearen kwam ik doar al achter. Zie hebt doar een kippenbedrief en onderdeel van het bestoan is dan het verkopen van kippen vöar in de panne.
De consument hef zo’n kippe het liefst dood in de vriezer, want aans krieg ie d’r zo’n gesmear van. En de supermarkt hef die beesten het liefst ok dood, as het eam kan ok nog dwars döar midden in een stukkie plastic verpakt. Dus sleug mien tante op vaste dagen een paar kippen de kop of. Zo’n beest bleef dan gerust nog een minute of wat döarlopen. As een kippe zonder kop.
Het zal het Knöldert-virus weane, want ik heb noe zelf ok kippen. En wie goat het seizoen van broedsigheid wear in. Lente dut met kippen hetzelfde as met vrouwvolk. Zie kriegt d’r wear zinne in. De hane hef d’r ok in de winter wel iedere kear genoegen an, mar dan blieft zien kippeties niet zo makkelijk zitten. Noe het lente is, nemt ze d’r alle tied vöar.
En van het ien kump het ander. Iniens ben ik mien eier-anvoer kwiet. Blik d’r een kippe op te zitten broeden. Det is dan nog niet echt een ramp. Mar op ienig moment zit d’r twee kippen te broeden en doarnoa drie. Die verzamelt vervolgens alle eieren die de rest van het köppeltie legt. Die paar eier die ik in de wekke ette kan ik in de supermarkt wel biekopen. Mar het meeste broedsel wördt voele eier onder moeders vleugels. En zit ik te wachten op wat d’r wél uutkump? Dan zit ik oaver twee moand met dertig kippen. En ok vöar mien kippenhok geldt: Enough is enough: genog is genog.
Een broedse kippe blif broeden tut de eier uutkomt en as de eier níet uutkomt, broed e döar tut de dood d’r op volgt. Det hebt ze mie verteld en umdet kippen gekke beesten bent, geleuf ik det. De zuuktocht mos dus goane noar het on-broeds maken van het kippenvolk. Ik heb de vroage breed uut ezet in plattelandskring. Want det soart dinge vind ie niet op internet. Het antwoard kwam van de vogelkenners Harry en Marjo: gewoon eam met de konte in de vijver drukken. Det zal ze.
Ik goa het probearen. Mar ik hoale de vrouw de kommende zommer verre van het zwembad weg.
Denne van Knöldert