Home / archiefcentraal / denne van knoldert bloempotten

denne van knoldert bloempotten

Toen ik jong was, kreeg ik een bloempot op de kop en alles wat doar onder vandan kwam, knippen de kapper d’r met een flinke scheare vanof. As een soart van protest heb ik doarnoa heel lang hoar ehad. Det was nog lillijker, mar ik moch het tenminste zelf weten.

Ik dach det ik de enige pechvogel wasse. Later zag ik op foto’s det iederiene in die tied een bloempottenmodel had en det iederiene doarnoa hetzelfde protest keus.

Toen ik det ien kear in de smiezen had, gingen mie de oong open. Bloempottenmodel, lang hoar, iniens ollemoal kale koppen. En vrouwen zag ik van peardestat noar pony noar zelfs scheef geknipte pony goan.

Het model is ien ding, klöar is ok wat. Vrouwen die met rood hoar van de kapper kwamen öm d’r met zien allen anders uut te wullen ziene, doarnoa had de kapper zwart in de uutverkoop en noe is de kleur wit. Een soart asgrauw van wit det mie mear an ernstige ziektes dut denken, mar ik höar aanderen altied zeng ‘o, wat stiet oe det mooi’. Mar det zal wel kommen umdet ie niet zo makkelijk zegt det de persoon ik kwestie d’r feitelijk met een domme kop knap ongelukkig op stiet.

Ömdet iederiene d’r tegeliekertied aanders uut wul ziene, zut iederiene d’r dus steeds hetzelfde uut. Lest had mien zunne een vriendinnegie bie zich det zich vöarstellen an mie. Ik zeg: “Alwear?” Bleek het een aander meissie te weane dan vöarige wekke. Vund mien zunne niet zo leuk, mar loat ‘m dan een aander gezichie zuken.

D’r is op dit moment een neeje rage gangs in het herenkapsel. Gin bloempottenkapsel, mar wel een soart van… Het verschil tussen het kapsel van toen en noe is denk ik de vorm van de bloempotten. Die bent teengwoardig mear langwerpig, denk ik.

Ik geleuf det het op het voetbalveld begunnen is. Toen iederiene – öm zich te onderscheiden – ollemoal dezelfde tatoo had, gingen de voetballers oaver op roze voetbalschoenen, die iederiene noe ok hef. En ömdet ie oe met een kale kop ok niet mear onderscheidt, bedach iemand det een brede bane hoar van vöar noar achter wel wat was. ’t Lik op het begin van een hanenkam, mar dan een niet ofgemaakt exemplaar.

Ik denk det het volgende kapsel een brede bane oaver dwars wördt. En ik denk det de man die doar met begint, minder volgers krig.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.