Home / archiefcentraal / denne van knoldert as de kippen

denne van knoldert as de kippen

Wie hebt een köppeltie kippen rondöm het huus lopen. Vief zwarten en vief rooien. Met een zwarte haene d’r bie. Ik heb die kippen noe een joar bekeken. As de natuur de woarheid pröt, hef det niet zo völle goeds vöar de integratie in het verschiet. En vöar de vrouwenemancipatie ok niet.

Öm met die vrouwenemancipatie mar te beginnen. Bertus de haene kan niet goed kukelen, mar det zeg niks oaver zien seksuele driften. Ik advisear oalders die op het punt stoat seksuele vöarlichting te gee’m an hun kinderen, een paar kippen en een haene an te schaffen. Ie hoeft dan allenig mar te zengen: ”zo dus”.

Hoewel, as de vöarlichting vöar meissies is, is det misschien toch niet zo’n goed idee. Want die haene kik niet op een kippetie mear of minder. Hij lust er de hele dag wel pap van. Zonder weinig seks d’r bie, mut ik zeng. De kippe hef noa ofloop (en det is al noa een seconde of drie, vier) hooguut de vearen an de konte wat in de warre. Weinig emancipatie dus, in het kippenhok. Weinig discriminatie ok. De haene hef net zo lief een zwarte kippe as een rooien.

De kippen onderling doet wél an discriminatie. Het köppeltie rooie kippen scharrelt altied eans aans öm het huus, dan het köppeltie zwarten. Sterker nog, as ik wat broodkrummels buten strooie, komt beide köppelties d’r op of. Onderling maakt de rooien en de zwarten d’r gin ruzie ömme wie de krummels pakt. Mar rood en zwart bevecht mekare wel!

Iniens waren d’r drie zwarte kippen broeds. Een moand hebt ze op de eier ezetten en de vracht eier wönn steeds mar groter ömdet ze d’r gewoon bie pakken wat een aandere kippe in hok leng. En zo kon het geböaren det d’r uut die eier een rooie en een zwarte kippe kwam. De broedse kippe – een zwarten – hef de kroost op evoed en kreeg doarbie de hulp van de andere zwarte kippen. Dus scharrelen d’r zo’n rood kippetie met zien zwarte mamma rond. Ik dach de opperste integratie mee te maken.

Mar wie bent anderhalve moand noa de bevalling en wat blik? Het rooie kukentie hef zien oalders al verloaten en hef de oaverstap emaakt noar zien rooie soartgenoten. Het zwarte kuken krig zien verderde opvoeding bie het zwarte köppeltie. Het rooie kuken krig wieders een rooie opvoeding.

Wat mut wie doar as meansen noe van learen?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.