Home / archiefcentraal / denne van knoldert reunie

denne van knoldert reunie

“Van de vestiging Roalte hebt zich d’r nog mar twee an emeld terwijl vestiging Ommen honderd procent deelname kent. Vanuut Deamter is de deelname ok goed.”

Met die mail maken de baas dudelijk det e vund det de vestiging Roalte zich ok wat royaler an mos melden vöar het personeelsfeest. Ik hoal doar niet van. As de man een feessie geef, dut e det om oons te plezieren. Mar as wie d’r gin pleizer in hebt, mut e niet zöaren as wie niet komt.

En toch zit de wereld zo in mekare. As een sportclub geld neudig hef, goat ze obligaties uutreiken. Kun ie vöar honderd euro per obligatie oe club een renteloze lening verschaffen die ze oaver tien joar terugge betaalt. Hoe kleiner dorp en club, hoe groter de morele druk die ze op oe uutoefent mee te doene.

Bie de loterij in de pauze van de dansuutvoering van oe dochter werkt het ok zo. Ik höare mie zelf stoer zeng: “doe mie het hele bonnenbuukie mar. Dan win ik vaste wel wat.” Mar ik hoef die prutpriezen niet, ik wul mien dochter van det gezeul met loten bevriejen.

En wedden det een gemiddelde geldinzameling vöar onderzuuk noar leverproblemen (gewoon niet zo völle zoepen) völle minder zol opleaveren as het niet de buurvrouw of – nog better – de buurkinderen waren die an de döare stoat? Het goeje doel is de sfeer in de stroate.

Met foekepotten is det ok zo. Mien earste ervaring doarmet as zelfstandig wonend mannegie was det ik op zolder an het werk wasse en iedere kear de vöardöarbelle höaren. Mar ien kear beneden was d’r nooit iemand. Tut ik d’r achter kwam det het foekepotmiddag was. Ik heb mie toen verschanst op zolder, want ik had gin snoepgoed in huus. Een joar later had ik det wel, zakken vol, mar toen kwamen de wichter niet mear bie die zunige buurman langs.

En zo hebbe wie met de Knölderts binnenkort een reünie. Ik mutte precies op die datum vöar mien werk noar New York (iemand mut het doene), dus ik kan niet. Det ontslöt mie metiene van de verplichting mee te delen óf ik zol goane. Vrogger gaf ik det wel an, want ik mag graag zeng hoe ik d’r oaver denke. Det hebt wel mear Knölderts. Mar ik wörd oalder, dus wat milder, wiezer, misschien mear een lafbek. Of gewoon een twiefelaar. Want eigenlijk ben ik zelf ok wel nieuwsgierig of ik zolle goan.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.