Home / archiefcentraal / denne van knoldert schone zat

denne van knoldert schone zat

De schoonmakers voert actie, en ik vind det ze groot geliek hebt. Want schoonmakers maakt schone wat wule smearig maakt. En det doet ze vöar een hongerloon ömdet de baas projecten annemt onder de pries.

Earst die bazen. Die nemt heel grote klussen een bittie op de gok an. Nem bevobbeld een ziekenhuus of een schoele. Dan rekkent ze uut hoe völle bureaus, wc’s, kasten en det soart dinge d’r stoat en dan sloat ze det ömme in minuten per stuk. De pries is dan het lage uurloon kear te weinig tied per object. Wat een schoonmaker verdient weet ik niet, mar ik weet wel det ze anderhalve minuut per bureau kriegt, iens in de wekke.

De baas maakt zien winst döar van die anderhalve minute vieftien seconden of te halen in een offerte. Wat in de praktijk inhölt det een neeje schoonmaker ’s monns in alle vrogte bienoa hardlopend döar de kantoorgebouwen wappert en een ervaren schoonmaker gewoon hier en doar een bureau oaver slöt.

De bazen geeft ok wel toe det het eigenlijk niet in de tied kan die d’r vöar stiet, mar ja, anders giet de concurrent met de klus lopen. Feitelijk is het dus de opdrachtgever die meewerkt an dit soart praktijken. Net as een gemeente die de goedkoopste thuiszorg inkoch en doarmee meewerkt an schandalig lage uurlonen.

Iens in de moand kump d’r een schoonmaakcontroleur langs die met een vinger oaver de plinten zut of d’r nog stof lig. En zo ja, dan zwaait d’r wat…

Ik heb mie det werk van een schoonmaker bie de NS ‘ns an ekeken. As de trein binnen kump en de reizigers d’r uut bent, hef een ploeg schoonmakers zo’n drie minuten de tied al die treinstellen spik en span te maken. Want doarnoa mut d’r wear neeje passagiers in. Zo wördt de trein dus nooit goed schone. Mar ik heb ok niet de indruk det de reizigers doar völle hinder van hebt. Die gooit zonder blikken of blozen drinkflessies, appelklokhuzen, pastic zakkies en weet ik wat ollemoal mear, gewoon van zich of. Zie creëert hun eigen vuilnisbelt dus eigenlijk.

Mien idee kump de schoonmakers ok niet ten goed, mar as ik noe een poetsdoek met nemme noar kantoar en iedere wekke anderhalve minute mien bureau schone make. En as ik noe mien eigen troep uut de trein met noar huus nemme. Is det eigenlijk niet völle goedkoper?

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.