Home / archiefcentraal / denne van knoldert minder pasjes

denne van knoldert minder pasjes

Ik wul het neeje joar in met minder pasjes. Ik heb pas een ov-chip-kaarte in de portemonnee en noe is de kontzak zo dikke det mie doar de spiekerbroek earder slit. Dus al die pasjes kost mie klauwen vol met geld.

Ik heb noe twee bankpassen, een creditcard van de banke, een anwbpas, een anwb-creditcard, mien riebewies, een pas vöar het veiligheidssysteem van het werk, die ov-chip-kaarte, een kortingskaarte van multimate en van bakker Van der Most, mien donorcodicil, de pas vöar de bibliotheek, een perskaarte en vief visitekaarties in de portemonnee. Inderdaad, het is mar goed det ik niet zovölle geld hebbe, want det past d’r niet bie in.

Nem de ANWB. Ien organisatie, twee kaarten. Det kan handiger. De banke, zelfde laken een pak. Wrum doet ze niet op íen kaarte alles wat ik van ze ofnemme? Wrum doet ANWB en Rabobanke niet saams? Zol ik in ien klap van vijf noar ien pas goane.

Het kan zo simpel. Alles en iederiene die mie een pas wul gee’m, zorgt vöar een unieke code. Die komt ollemoal bie mekare op ien kaarte. Een reader (een kaartleazer) van de conducteur, de politie, de pinautomaat en de neeje eigenaar van mien hart, kunt heel snel ziene of d’r mag geböaren wat d’r giet geböaren.

Mar wrum zollen wie het makkelijk doene as het mulijk kan. Ik nam een ov-chip-kaarte. Det mos een persoonlijke kaarte wönn, wegens declaratiemogelijkheden, mar de pasfoto mog ok gerust een vakantiefoto weane, dus de hele familie stiet d’r op en kan d’r dus gebruuk van maken. De NS gaf ik toestemming töt automatisch opwaarderen öm niet met een löage pas te komm zitten en doarnoa mos ik met de opgestuurde kaarte earst bie op een oplaadpunt het automatisch opwaarderen activearen, toen noar een anmeldpunt öm de keus vöar eerste of tweede klas te maken (pas op: legitimatie niet vergetten) en toen op internet al die acties bevestigen, woarbie ik mien hele doopceel mos lichten.

Typisch een systeem woar de witte boarden van ons land te lange oaver noa edacht hebt. Wrum krieg ik gin kaarte van de NS thuus die direct dut wat e mut kunn? Of better nog: wrum heb ik vöar het openbaar vervoer een aparte pas neudig? Wrum kan ik niet betalen met mien bankpassie?

Ik hoeve vöar iedere winkel toch ok gin ander betaalpassie te hemm?

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.