Home / archiefcentraal / denne van knoldert boerkaverbod

denne van knoldert boerkaverbod

Wule haa’n ofgelopen zundag een mooie wandeling uut-ezöcht in de uterwaarden van de Iessel bie Wilp. Achter Deamter. Het was zoaterdag prachtig wear ewest en doar wollen wule de zundag d’r op nog eam extra van genieten.

Mar toen was het zundag hillemoal gin mooi zunnig wear. Het was smearig koald, zo koald det mien fleece-trui eigenlijk onvoldoende warmte beud en ik had better de wnterhandschoene met kunn nemm’ dan die halfdunne windvangers vöar op de racefietse.

Mien vrouw en ik waren niet de ienigen die wat leupen te bibberen op de paden van de koale uterwaarden, van het overigens prachtige stukkie Nederland. D’r waren d’r mear die De Dijkroute, een anroader van 15 kilometer lang, op disse onverwacht koale en zwoar bewolkte zundag an waren egoane.

Ik wasse zowat de ienigen die met de kale klatse in de oostenwind rondleup. Mien vrouw had een sjaal as een hoofddoek ömme sloane. En vöaral wielrenners en minder harde fietsers hadden nog mear warmte oaver de oaren en het vöarheufd etrökken.

Iniens zei een passant mie heel vriendelijk goejendag. Ik vreug mie of, of ik hemm eans van mosse kennen. Mar hoe? Ik zagge zowat niks van die ‘ha, goejemiddag’-zegger. Ik wus nog niet iens of het een man of een vrouw was. Want vermoedelijk döar de koale was zien (of haar) stemme höarbaar van slag.

Dus det mut nog wat goan wönn, de kommende winterperiode. Iederiene trekt de pette diepe oaver de oaren, lött allenig de ogen vrie as ze een sjaal ömme sloat, haalt warme bivakmutsen uut de kaste vöar een heerlijke schaatstocht. Niks mis mee? Ja zeker wel. Het mag niet mear. Nederland hef het Boerkaverbod in evoerd.

Een Boerkaverbod. Een actie van onze bange landsbestuurders die niet zelf leidt, mar zich loat leiden döar de nog bangere Henk en Ingrid. Zie bent bange van meansen met een klöartie, mar zie bent nog banger as die meansen niet loat ziene det ze een klöartie hebt.

Een boerkaverbod geldt ok vöar de integraalhelmverbod en een bivakmutsverbod, anders veul de discriminatie van de maatregel zo op. Mar det leavert met de ingevallen winter dus wel problemen op. Want de bivakmutse die ik in de kaste hebbe ling, die draag ik allenig mar op natuurijs. Eind van de wekke dus. En dan veertien dage lang. Zollen ze doar nog een uutzondering vöar maken? Vaste wel. Want allenig blanken doet mar an schaatsen. Döarumme is carnaval ok een uutzondering.

Loat het noe töt carnaval goan vriezen… Kunne wie töt dan ziene wat een onzin die neeje wet is.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.