Home / archiefcentraal / denne van knoldert uutslaang

denne van knoldert uutslaang

Het wördt steeds lastiger op zundag öm 19.00 uur nog gin enkele voetbaluutslag van die middag te weten. Ik wulle, as ik met het börd op schoot noar Studio Sport goa kieken, hillemoal blank an de samenvattingen beginnen.

Zonder vöarkennis is de spanning het grootst. Mar zo langzamerhand is de spanning nog groter al die uutslaang te ontlopen.

Ik ben een Teletekstkieker en volg ok op zundag het landelijk nieuws via Teletekstpagina 104 en verder. Ik probear bewust niet in te stromen op 100 of 101, want dan leas ik zo mar iniene ‘ Twente nieuwe koploper’ . Tja, dan weet ik al wear te völle.

Mar op zundag noar een veldwedstrijd van het wielrennen kieken, is ok heel ingewikkeld ewönn. Dan krieg ie iniens zo’n tickertape onderlangs met de standen van de eredivisie. Het lukt mie niet noar de wielrenners te bliem kieken zonder mien oong noar die tickertape te loaten schieten. ’t Is net as een gesprek voeren met een vrouw met te diep decolleté. Oe oong wördt gewoon noar det borstbeeld ezöang. Dus as de uutslaang onderlangs dreijt, scherm ik het onderste deel van het beeld of met mien hand.

Al wear een tied terugge ging mie det verkeard en zag ik toch det Ajax–Heracles 0-0 was e wönn. Earst balen ik. Mar met verstandig noadenken heb ik det in een jubelgevuul weten ömme te zetten. Twente had PSV al versloane en Ajax had 0-0 espöld. Wear een kampioen uut het oosten.

Zit ik ’s oams plichtmatig noar Ajax-Heracles te kieken en maakt keeper Pasveer een enorme blunder. 1-0 vöar Ajax. Ik denk earst nog det die goal wel of eköard zol goan wönn, mar det geböaren niet. Conclusie: die standen van die middag waren tussenstanden… Was ik dus vöar niks die hele middag blie e west en ging Ajax ok nog winn ok.

Ik twitter ok graag. Mar ok det is niet mear verstandig. Ik volg Jan Mulder en die gif steeds zien commentaar op wedstrijden. Dus zundagmiddag twitteren kan ok niet mear.

En recent is het vrouwvolk in huus ok mien teengstander. Vrogger gaa’m die niks öm voetballen. Mar sinds die manvolk antrekt, is het uut die hoek ok uutkieken. “Mar wrum volg ie het zundag niet ollemoal live? Is toch ok spannend?” wol een vriendtie weten.

Tja, det weet ik eigenlijk ok niet. Zundag 19.00 uur Studio Sport, det is al veartig joar zo.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.