Home / archiefcentraal / denne van knoldert korter

denne van knoldert korter

Iedere kear as ik de ofwasmachine uutpakke vroag ik mie of, of det sneller kan. Det zit zo: wie hebt de ofwasmachine in een hoek van de keuken. De kaste vöar börden en köppies stiet an de aandere kaante van de open keuken-kamer. Mien vroage is noe: pak ik better een dienblad stampvol en loop ik doar mee noar die kaste? Of loop ik vöar iedere handvol schone vaat het huus döar?

Bie het bouwen van het huus begun det denkwerk al. ‘Logistiek’ heet die tak van wetenschap en wetenschappers werkt dan met annames. Bevobbeld det het bestek earst uut de vaatwasser giet, dan de köppies en tot slot de börden en pannen. Dus mut de bestekla het dichste bie weane, de planke vöar de köppies op twidde ofstand en de opbergplekke vöar de börden en de pannen meung iets wieder vot. Die anname wördt versterkt döar de gebruuk-frequentie. Börden en pannen het minst, dus is het niet zo erg det ie doar iets wieder vöar mut lopen.

Mar wetenschap is dom. Einstein, vöarwaar gin kleine jongen, zei het al: kennis brengt ons van A noar B, verbeelding brengt ons noar oaveral. Wetenschappers stoat zich d’r op vöar Einstein te begriepen, dan hebt ze het oaver zien toevallig ontdekte relativiteitstheorie en niet oaver zien wieze uutspraken.

Ik heb mie een groot dienblad an’eschaft woarop ik alle köppies en börden uut de vaatwasser in ién kear kanne hoalen op weg noar de opbergkaste. Het is een rond dienblad e wönn ömdet ik dan mear op dezelfde oppervlakte kwiet kanne dan op een vierkant dienblad. Minder verlies in de hoeken. Op het aanrecht pak ik het dienblad altied heel secuur op, loop in ien kear noar de kaste en pak doar het blad wear heel vöarzichtig of.

Ik hoale mie vöar det det de snelste wieze van ofwasmachine uutpakken is. Mar mien dochter studeart inmiddels, dut an onderzuuk, en beredeneart det det secure oppakken zo völle tied kost, det ik in ruil doarvan better twee kear met een minder goed opgepakt dienblad hen en wearömme kanne lopen. En mien vrouw dut het zelfs liever in dree kear, want as haar onderweg een dienblad uut de haane glipt en de boel kapot dondert op de stenen vloere, hoeft wule mar een derde op nieuw an te schaffen.

Mien jongste dochter zeg det de meeste tied giet zitten in noadenken oaver de minste tied. Haar strategie? Nooit de ofwasmachine uutpakken.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.