Home / archiefcentraal / denne van knoldert op het platteland

denne van knoldert op het platteland

Een van de familieleden kreeg een enquête in huus oaver ‘leven op het platteland’. Wie hebt van het invullen een soart ‘Ik hou van Holland’ emaakt. Dus was de enquête goed vöar oamdvullend plezier. Mar ik ben bange det de antwoarden serieus meegoat in te trekken conclusies.

‘Ongevear hoevölle van de mensen uut het dorp ken ie bie de vöarname?’ was een vroage. Ik kenne d’r een heleboel ongevear bie de vöarname, mar det tellen niet. Mien vrouw zetten namens ons team in op 350. Het kamp van de wichter dörm met gemak ‘mear’ te roepen. Bie de antwoarden bleken wie de keus te hemm uut 0, töt 5, töt 20, töt 50, of mear. Woarop de Jeroen van Koningsbruggen in ons team zei: “wie woont niet in de stad of zo, det wie niemand zollen kennen…”

Een andere vroage ging oaver met wie wule wel ‘ns contact hebt. Met meansen oalder dan 70, met meansen tussen 15 en 25 joar, met dorpsgenoten die hier geboaren bent, met volk det d’r net is komm wonen, met geestelijk gehandicapten, met lichamelijk gehandicapten, met wel en niet döargeleard volk… Dan goa ie toch ofvroang wat het nut is van zo’n enquête is. Wat hebt ze an de antwoarden?

En zie wollen niet iens weten of ik ok wel iens contact hadde met de dorpshomo, de dorpsgek, bromsnor of de schearensliep. Ik bedoele, ik woon wel op een dorp.

Volgende vroage: of ie bereid waren in de buurte af en toe te helpen met een klusje in de huusholding, boodschappen doene, bloemen water gee’m. “Lig d’r an hoe völle ik d’r mee verdiene”, was het goede antwoard van het team woarin de wichter zaten, mar det antwoard stund d’r niet bie.

Andere vroang: of wie wel ‘ns last haa’n van de trekker van de buren, of dorpsbewoners ons wel waardeart, of wule ons bekeken vuult, of wie d’r eigenlijk wel bie höart… As ik al nie een complex had, dan heb ik d’r noe wel iene.

En toen een setje vroang oaver kinderen krieng zonder te trouwen, samenwonen van twee mannen of vrouwen, een caissière met een hoofddoekje… Ik heb de enquête nog eam noa eleazen op wat ik van enquêtes vunne, mar die vroage zat d’r niet bie.

De antwoarden bent keurig noar I&O Research egoane. As de conclusies straks bekend wördt, mut ie d’r niks van geleum.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.