Home / archiefcentraal / denne van knoldert harde wand

denne van knoldert harde wand

Ik keek via LinkedIn noar het profiel van een oald collega. De man is ‘Manager Bedrijfsvoering domein EMMC at Hogeschool Windesheim’. Det lik mie een mooie bane. Een bane van ’s monns d’r öm 09.00 uur weane, tussen de middag lunchen en dan een wandeling maken met wat collega’s en teeng 16.00 uur de boel vaste wat oprommelen vöar noar huus te goane.

Mar wat de ‘Manager Bedrijfsvoering domein EMMC at Hogeschool Windesheim’ in de tussentied dut, doar ben ik nog niet hillemoal achter. Noe was det in mien tied op Windesheim wel vaker zo. De baas van het kluppie bemuuien zich oaveral met, behalve met zien eigen werk. In een werknemers-tevredenheids-onderzuuk kreeg e dan ok altied een onvoldoende. Wie det benumen, kreeg een psychische klap an de kop.

LinkedIn is een verzamelplaatse op internet woar meansen die iets hoger opgeleid bent elkare vindt. Ik doe d’r noe al dree joar an met, heb al 400 connecties, mar kan mie verders niet bedenken wat vöar zin het hef. Want al mien connecties had ik anders ok wel ehad. Mar ik vind het wel mooi öm te ziene hoe iederiene zich profileart op zo’n site van zien en gezien worden. Zie bent ollemoal drs, ing, eigenaar, manager, teamleider, of anderszins ergens de baas oaver. Det is wel iets van hoger opgeleiden. As ie gin ruwe bolster bint, mut ie oe mannelijkheid of vrouwelijkheid op een andere maniere bewiezen.

Mar ergens de baas oaver weane, ik weet niet of det altied zo’n vöardeel is. In ondernemersland wens ie iemand woar ie een hekel an hebt bevobbeld völle personeel. En net as personeel zich anders teeng de baas gedraagt, gedraagt iemand zich ok anders as e eans de baas oaver is. Det geböart al heel gauw: maak iemand verantwoardelijk oaver de bessemkaste en hij giet zich aans gedraang.

En toch wult wule ollemoal baas weane. En döarumme bent d’r zovölle bazen, tussenbazen en tussen-tussenbazen. Zo mos ik op mien werk ‘ns een kear een heel grote klokke an de kante hemm opgehangen. De hoofdconciërge die ik doar vöar vroeg wol weten of het een harde of een zachte mure was, woar de klokke an mos. Ik vroeg of e det wol weten in verband met de boare die e mee nam. Mar het bleek, det as het een harde wand was, det ik dan een andere hoofdconciërge mos hemm.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.