Wie mut of van de zesjes-cultuur, zeg Halbe Zijlstra, de staatssecretaris van Onderwies, en döarumme wul e vöarkommen det Jan en alleman mar zo noar wat vöar hogere beroepsopleiding dan ok kan. Een student mut – wat hem beterft – wel earst antonen det e gemotiveard is vöar de keus die e maakt..
Ik zie det al vöar mie, een student wul rechten goan studearen. Wördt ‘m evroagd of e wel gemotiveard is. Zeg die student: “Ja”. Nou, dan is e welkom. Zeg e nee, dan… Och, die vroage hoef niet beantwoard te wönn, want zie zegt ollemoal “Ja”.
Mooi kabinet hebt wule. Kunst wördt de nekke öm edreijd. Op Radio 2 mut mear Nederlandse muziek komm. Politie’s wördt verplicht öm eschoold töt dierenpolitie. De Vogelaarwijken kriegt gin subsidie mear. Hoofddoeken stoat onder druk, Islam is gin geleuf mar een cultuur. In de helft van de café’s wördt wear e rookt, Wiet wördt harddrugs en drank wördt halfslachtig an epakt. Kortom: de boel wördt in no time noar de kloten ehölpen.
Hirsch Ballin zei zundag op tillevisie det wule qua holocaust niet allenig noar 40-45 mut kieken, mar ok noar 33-40, in de tied det langzaam mar zeker allerlei rechten van minderheden of epakt wö’nn, democratie is ok det de mearderheid niet alles ofpakt van de minderheid. Aldus Hirsch Ballin, een Duutse Jood die met zien olders noar Nederland vluchten tussen 33 en 40 en die dus redelijk goed weet woar hij het oaver hef en alle reden had teeng de koers van het CDA te weane.
Zoaterdag zei Viggo Waas op de radio te pruu’m det de huidige bestuurders een satanisch genoegen hebt in haat te zaaien richting links elite.
Vöarige wekke höaren ik Anton Corbijn zeng det het cultuurbeleid in Nederland lik op det van Stalin en Hitler.
Mar Knöldert, wat hef det ollemoal te maken met die zesjescultuur? Noa, eigenlijk wel een hele hoop. De boel een bittie strabant anpakken is zo verkeard nog niet. Wat scheef egruuid is, kun ie het beste mar met lange halen, gauw thuus wear terechte zetten. Mar net as in de joaren zestig de linkse hippies te völle döarsloegen in de eis noar vrijheid, slöt rechts noe döar in het beteugelen döarvan. De hippies wollen een 8 vöar hun veranderingen. Halbe Zijlstra wul een 9 vöar zien beleid.
Ik werk ok in het onderwies. En ik heb ok een hekel an de zesjes-cultuur. Döarumme geef ik iederiene gewoon een zeum!
Denne van Knöldert