Home / archiefcentraal / denne van knoldert telegraaf

denne van knoldert telegraaf

“Of ben ie ok zo’n linkse geldopmaker” zei de verkoper van de Telegraaf vanachter zien stand op de markt in mien dorp. Ik ben links, mar ik ben gin geldopmaker. Want öm geld op te maken, mut ie het earst hemm en dan zol ik wel rechts weane.

Ik ging het gesprek met ‘m an. Of ‘gesprek’… eigenlijk wönn het een monoloog. “Nee, gin linkse geldopmaker, mar ok niet zo’n rechtse metloper as det ie bent. Geldopmakers det bent de luu die vöar de hypotheekrenteoftrek bent, want det is de grootste subsidie van Nederland. Wus ie det Telegraafleazers de meest bange mensen bent? Ömdet die kraante van oe de werkelijkheid zo verschrikkelijk vervormt. Zal ik det rechtse metlopen van oe nog wat uutdiepen? Samenwerken met Wilders die in doen en loaten precies hetzelfde dut as Hitler vöar de oarlog. Een krante verkopen die in de oarlog ok al fout was? Wat d’r mear van is, heb ie wel een vergunning öm hier die rabiate troep van oe uut te delen?” De laatste woarden zei ik wat te hard, zodet de ömgeving het met kreeg. Menear wönn wat stille. Hij wus niet of e rood of wit öm de neuze mos wönn. Ik dache, as ik ‘m een blauw oog sloa hef e de Nederlandse vlagge compleet.

Mar het ergste van det al is, ik stoa op het punt op vakantie te goane en wat vöar krante kun ie in het butenland allenig mar kopen? Inderdaad, de Telegraaf. Ik heb mie döarumme internet op de tillefoon enömm zodet ik via die weg op de hoogte blieve. As mie het installeren tenminste lukt. Want ik ben niet zo handig in die applicaties. Ik ben al blie det ik weet wat een applicatie is.

Ik kan wel zeng det ik feitelijk knettergek wörde van al die digitale toevoegingen an allerlei apparaten. Zelfs de weagschoale mut mie digitaal op de hoogte hoalen van mien gewicht en ik hoal het d’r voorlopig op det doar nog altijd iets mis giet.

En vöar de reis noar het butenland mut ik mie ok goan verdiepen in de OV Chipknip. De leste strippenkaarten heb ik vot munn gooien. Ik mutte noe de busse noar Deamter betalen met een Chipknip. Vandoar noar Schiphol en dan met vakantie. As het met die chipknip niet lukt… dan hoef ik de Telegraaf ok niet te kopen.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.