Home / archiefcentraal / denne van knoldert bolcom

denne van knoldert bolcom

Ik hecht d’r waarde an, te vertellen det dit verhaal een werkelijk feitenrelaas is. Het höart thuus in de categorie ‘en noe pik ik het niet mear’. Het giet oaver een mobieltje det ik koche via Bol.com. Det was iets goedkoper, mar ik had d’r achterof graag iets mear vöar betaald bie een ander bedrief.

De tillefoon, een Nokia, koch ik in januari van dit joar. In april ging het ding kapot. Ik zol namens Bol.com de hele handel mar opsturen noar reparateur Dynafix. Ik kreeg er een tracé and track nummer bie zo det ik via internet konne ziene op wulk postkantoor en bie welke reparateur mien pakkie op det moment is. (Wrum is det eigenlijk? Gewoon gauw hensturen, repareren, teruggesturen is toch genog?) Ik zag det Dynafix mien tillefoon op enig moment verder sturen, noar een aandere reparateur. ‘Mooi kapot’ dach ik nog en ‘zal wel lange goan duren’. Inderdaad, drie wekke later had ik het toestel terugge. “Mankement niet gevonden.”

Mar nog wel kapot, bleek bie anzetten. “Wat noe?” vreug ik Dynafix. Dina die het wel eam fikst. Det klinkt niet erg vertrouwd. “Nog maar een keer weer toezenden”, was het antwoord en ik kreeg zelfs een antwoordnummer zodet ik gin postzegel hoe’m te plakken.

Dree wekken later stund de postbode wear an de döare met mien Nokia. Mankement niet gevonden. En inderdaad: nog wel steeds kapot. Ik ben toen uut een ander vaatje goan tappen. Wat ze bie Dynfix wel niet dachen en det ik een andere tillefoon eisen. “Mar meneer, ie hebt niet bie ons ekocht. De garantie mut ie eisen bij Bol.com. En doarbie, wule repareert hillemoal gin Nokia’s. Wule stuurt alles verder…”

Bie Bol.com vroegen ze mie – echt woar – de tillefoon op te sturen, zollen hullie hem noar de reparateur sturen. “Noar wie dan?”wol ik weten. “Noar Dynafix.”

Ja, toen leup het spoar toch wel eam dood, in mien boamkamer. Ik heb wel tien kear töt tiene geteld, vöar de volgende stap. Ik heb het zakelijk ehoalen. “Geachte klantenservice. Doar goa ik niet mee akkoord. Stuur mie mar earst een neeje tillefoon zodet ik wear mobiel benne.” Hun antwoard: “We zien dat u niet akkoord gaat. Dan schakelen we een andere afdeling in.”

Ik denke det het de ofdeling ‘öm de tuin hen leiden’ (onder de categorie ‘list en bedrog’) is, want töt heden heb ik niet mear wat terugge höard. Dus det wördt vervolgd.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.