De tillefoon was kapot. Ik had het verdeelkassie an een spieker op’ehang en döar het metaal van die spieker was d’r kortsluuting ontstoane. “Weet ie zeker det het modem kapot is?” vreug de student van het callcenter an de aandere kaante van de lijn?”
“Ja, d’r kwam rook uut.”
”Dan denk ik ok wel det e kapot is”, gaf e toe.
Zie zollen een monteur langs sturen. Een dag later al. En wel öm 8.15 uur in de ochtend. Service toch? Ja. Inderdaad. Mar toen was d’r al een halve dag an ergerlijke tillefeunties an vöarof e goane.
“Om de kwaliteit van onze diensten te verbeteren, vragen we u deel te nemen aan een enquête. Kies 1 als u mee wilt doen, kies 2 voor als u niet me… Ik keus snel 2 en stund dus heel lange in de wacht. Een irritante stemme zei wel een kwartier lang det de wachttied nog een minute was.
Toen d’r iemand an de lijn was, gaf e as earste de tip det ik de vollende kear better met een landlijn konne bellen, want det was völle goedkoper. Ik zegge: ”sneller anpakken schelt ok een hoop in de kosten. En doarbie: mien vaste tillefoon is kapot.” Nou, dan had ik een ander nummer munn bellen. Hij gaf het goeje nummer en verbrak de verbinding. Hij bleek mie van Ziggo noar TMobile estuurd te hemm. Ok een klotenbedrief, mar doar mos ik in dit geval niet weane. Zol zo’n jongen in een callcentrum vöar mear bedriem vroang beantwoorden?
Uuteindelijk was ik goed. En toen wol de man an de andere kaante mien postcode hemm. Mar die wol ik niet kwiet, ik wol earst weten of e mie kon helpen. D’r was een kassie van hun kapot en ik wol weten wat det kassie kosten, of ik det ok eans aans konne kopen. Mar ik kwam niet an die vroage toe. As ik mien postcode niet gaf, zol e de verbinding verbrekken.
Ik zeg: “dus as ik bie EP een neeje koelkaste wulle kopen en ik geve mien postcode niet, dan mag ik doar gin koelkaste kopen?”
”Zoiets ja”, zeg die snotneuze, “Ik maak hier de regels niet.”
Ik zeg: “Nee, en ik denk ok niet det ze oe d’r ooit vöar zult goan benaderen. Looser!”
Vanmonn öm 8.15 uur stipt was de monteur d’r. Hij verwisselen het rokerige kassie en ging wear vot. De tillefoon dut het wear. Mar noe is internet kapot.
Denne van Knöldert