Home / archiefcentraal / denne van knoldert bevrijding

denne van knoldert bevrijding

Vingerofdrukken van het paspoart meung niet mear bewaard wönn. TomTom gif zien informatie niet mear an de politie. En Play Station hef 70.000 creditcardnummers an hackers e’geem. Ziedoar ien wekke internet.

Loat wie ze iens langslopen. Te beginnen met Play Station. Det is een computer woarmee ie heel saaie en domme spellegies kunt spöllen. Det kan via internet met teengstanders oaver de hele wereld. Zo’n spellegie mut ie digitaal kopen en betalen met oe creditcard. Sony – de eigenaar van Play Station – bewaart al die kaart-gegevens. En een kraker hef ontdekt woar. Zo kan het weane det een onverlaat vanuut Amerika met oe creditcard dure dinge koch, terwijl ie in Nederland bent. Det wördt trouwens snel ontdekt want als ik in Salland pinne en een uur later in New York, dan giet bie de banke een bellegie rinkelen. Det ie mar weet det ze oe in de gaten hoalt.

As ik met mien TomTom de weg zuke eans in Nederland, registreart det kassie precies woar ik benne. Aans kan e mie de weg niet wiezen. En öm te weten hoe lange ik d’r oaver doe, kik e ok hoe hard ik rieje. Handig, mar die informatie wördt opesloane en is verhandelbaar. Zo koch de provincie die info, öm weang woar te hard e rene wördt, veiliger te maken, zegt ze. Mar as Petrus Jezus al verloochent, wrum het CDA oons dan niet? En inderdaad: de provincie leent die gegevens wear uut an de politie die dan weet woar ze het meeste geld verdient met snelheidscontroles. “Vöar de verkearsveiligheid”, lög de politie die ok wel weet det d’r oaverdag – as ze controleart – hillemoal gin ongelukken mear geböart wegens te hard riene, doarvöar is het völ te vol op de weg.

En dan de vingerofdrukken in oons paspoart. Twee wekken elene weigerde zo’n alternatieve Amsterdamse alleenstoande moeder die ofdrukken of te gee’m wegens onveiligheid. De rechter gaf haar ongeliek. Wet is wet. En noe hef de twidde kamer dus ezegd det die centrale opslag inderdaad onveilig is, vöaral ömdet die verzameling ofdrukken döar Jan en alleman egapt kunt wönn. Bent politieke vöarstanders van het systeem noe niet staatsgevoarlijk?

Töt zoverrre de teruggedreijde vöarbeelden. Ik ben benieuwd noar woar het ollemoal nog mear gevoarlijk is. Wie herdenkt disse wekke de oarlog, woarin burgemeesters de joden-adressen döargaa’m an de Duutsers. Ik zie gin enkele reden te veronderstellen det het met het huidige politieke klimaat niet zol geböaren. Met moslimadresen bevöarbeeld. In disse tied is det digitaal zo gepiept.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.