Home / archiefcentraal / denne van knoldert 1234

denne van knoldert 1234

Zie hebt ontdekt det de voice mails van Vodafone zo makkelijk te kraken bent. En twee daang later kwamen ie van Tele-2 en Telfort d’r ok bie. Ik weet niet hoe goed het geheugen van journalisten is, en ik weet ok niet hoe hard of ze werkt, mar binnenkort kump in het nieuws det dit ok met de voicemails van oe huustillefoon kan as ie de KPN-service gebruukt.

Hoe mulijk kan het weane?

Toen ik het nieuws vöarbie zagge komm mos ik eam wear denken an de bouwfraude. Det ondernemmers priesofspraken maken oaver hoe hoge ze in zollen goan schriem. Zie wezen van te vöaren an wie de klus kreeg. Det was bie toerböarte een aander van het stel. Die schreef dan as laagste in, mar nog wel völ te hoge. Hij maken dan zo völle winst det het gin enkel probleem was as zien ‘concurrent’ een volgende kear een grote klus kreeg. Klokkenluider Bos hing het an de grote klokke, mar ik wus al lange det het zo ging (en vaste nog wel zo giet). Want as ie in het leam stoat, höar ie wel ‘ns wat.

Acht joar geleden heb ik met studenten journalistiek al iens an etoond hoe makkelijk det giet met een voicemail van aanderen ofluusteren, zelfs de insprektekst te veranderen. Wat is namelijk het geval? Een antwoardapparaat gif de eigenaar de optie ok vanof elders zien voicemail of te lusteren. Hij belt zich dan zelf, wacht töt de voicemail begint te proaten (“ie sprekt de voicemail van oe zelf, ie kunt een bosschop achterloaten noa de piep”) en drukt dan midden in die meldtekst twee keer achter mekare op de ‘r’ van zien tillefoon. Op det moment zit e in zien eigen antwoordapparaatsysteem en kan e kiezen: Voicemail oflusteren of meldtekst veranderen. Mar dan mut e wel earst zien pincode intypen. Die pincode mut e bie anschaf zelf instellen. Anders is het de fabriekscode. En det is altied 0000 of 1234. Mar de meesten luustert hun voicemail nooit op ofstand of. En döarumme verandert ze de fabriekscode niet. Mar ie kunt de voicemail wél op ofstand oflusteren. Een aander dus ok. As ie mar midden in de meldtekst op de ‘r’ drukt. Dut 0000 het niet, dan is 1234 wel goed.

Tip vöar wie iemand belt, zien voicemail krig en het boamstoande dan uutprobeart: maak een andere meldtekst. Bedenk mar wat moois.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.