Home / archiefcentraal / denne van knoldert vol te duur

denne van knoldert vol te duur

Ik goa disse wekke op de partij stemmen die de waterschappen wul opheffen. Want wat kost det ollemoal wel niet. Ik had vöarige moand een menear van Lococensus an de döare die namens het waterschap kwaamp kieken hoevölle ‘eenheden’ d’r achter de vöardöare zaten. Want bie de Kamer van Koophandel (wat kost det wel niet) haa’n ze begrepen det Denne niet allenig met zien gezinnegie leam. D’r was ok nog een bedrief op het adres gevestigd.

Die menear heb ik an de vöardöare uut elegd det Denne zien geld niet allenig kan verdienen met dit soart verhaalties in mekare knutselen en det zien communicatiebedrief ok een adres hef. “O ja”, zei de man en reed in zien auto wear terugge noar Lelystad.

Wat kost det ollemoal wel niet.

Dus kreeg ik dree wekken later – had die man mooi nog een paar werkdage de tied öm zien werkveldbezoek te rapportearen, te declarearen en ömme te zetten in actie – de definitieve anslag vöar het waterschap. Drie brieven. Ientie vöar 2009, ientie vöar 2010 en ientie vöar 2011. Het mannegie zol wel denken: gin drie bedriem achter de vöardöare, dan gewoon een anslag oaver drie joar. En d’r zat ok een enveloppe bie det ik Lococensus kon machtigen gewoon geld van mien bankrekkening of te schriem.

Een enveloppe met een antwoordnummer. Die heb niet gebruukt vöar de machtiging, ik kiek wel uut. In de enveloppe zit noe een brief an hullie. Want op de site kon ik gin emailadres vinn. “Geachte, ik schrief ule een brief. Det is een vöaroorlogs middel. Mar ja, jule hebt nog gin email. Ik heb döarumme ok mar met podlood eschreem, want det zult jullie wel ewend weane. Wrum krieg ik een waterschapsanslag vöar drie joar? Heb ik in 2009 niet betaald? Mut ik oaver 2011 vöaruut betalen? En zo ja, heb ik det dat in 2010 ok niet edoane? Ule mut het verder doene met een handtekening, want ik kan mien zegelstempel niet zo gauw vinden. Was getekend, Denne.”

Ik verwacht ien disser dage wel wear een auto op de oprit vanuut Lelystad. Det d’r wear een menear – vaste op een mooie lentedag – vöar kump riene öm det te doene wat e telefonisch ok wel of kon. Wat e mie giet uutleng weet ik niet. Mar det het ollemoal te völle kost, det weet ik wel.

En döarumme giet mien stem disse wekke noar een partij die de waterschappen wul opheffen.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.