Home / archiefcentraal / denne van knoldert tweet tweet

denne van knoldert tweet tweet

Ik ben van de wekke wat actiever ewönn in het twitteren. De opzet is det ik dinge twittere die een column zollen kunn wönn. Lik mie leuk vöar mien volgers, det ze dan ziet wat d’r vöar neudig is öm een column te schriem, wat de basis kan weane vöar een verhaaltie. Jammer det ik mar drie volgens hebbe…

Zo had ik vöarige wekke in de mist noar Zwolle een bumperklever. Een politie-auto. Det hef wel iets in zich vöar een column. Vöaral toen ik de terugweg, nog steeds mist, wear een bumperklever hadde. Een waardetransport van Brinks.

Bie bumperklevende politieagenten dwaalt mien gedachten of noar de meansen die politie wördt. Degene die ik kenne, bent prachtig mooie luu woar ie – privé – een bult schik met kunt hemm. En ok in functie hef het mie al wel ‘ns e höalpen det ik de agent in kwestie kenn. Zo was ik als journalist op weg noar de rechtbank vöar een verslag, toen ik an ehoalen wönn vöar te hard riene. “Woar giet het hen”, vreug de agent, kennis en buurman die mie betrapt had. Ik zeg: “Ik heb hoast. Ik mutte noar de rechtbanke.” Woarop hij zei: “Nou, mar ik geef oe gin beköaring höar!” Desondanks: as een politieauto bumper kleeft, dan kump d’r adrenaline bie mie op. Hoe dom kan een agent weane det te doene?

Det waardetransport van Brinks was misschien nog wel dommer. D’r kon gin extra auto stief tussen hem en mie in, zo kort reed e op mie. Remmen!, denk ik dan. Keihard. Det det bussie kantelt en al het geld d’r uutweijt. Mar ja, ik heb net een aandere auto. Garage Vulink zut mie al ankomm: “Hei-j d’r noe al een foeke in e rene?” En ik heb ok ergens e leazen det det geld in koffers zit met verfbommen. Bie openen van de koffers spat die verf oaver het geld. Det schöt ok niet op. Remmen, det blif bie een gedachte, bie een column.

Noe was van de wekke in het nieuws det ‘ze’ een puntenriebewies wult invoeren vöar iederiene. Maak ie een oavertreding, dan krieg ie strafpunten. Bie te völle strafpunten ben ie oe riebewies kwiet. Eigenlijk net as noe, mar dan met mear regelties d’r ömme hen. Nog buten det det een maatregel is teeng het electoraat van dit kabinet, weet ik niet of det verstandig is. Want straks hebbe wie gin politie mear oaver die auto mag riene.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.