Home / archiefcentraal / denne van knoldert teletekst

denne van knoldert teletekst

De Rabobanke hef vöarig joar 1,3 miljard euro winst emaakt. Det bedrag is zo onwaarschijnlijk hoge det ik op teletekst nog eam controleare of ik het goed hebbe. Nee, fout inderdaad. Het is 2,5 miljard. Noe begriep ik wel wrum of een pin-automaat in Roalte Noord te duur was vöar de banke.

Op teletekst veul mie op det d’r völle mear logica in de wereld an de hand is.

In Japan klapt de kerncentrales uut mekare. Oons land wul ok zo gauw mogelijk van die dinge. De veiligheidscirkel bie evacuatie löpp döar Duutsland en Frankriek. Det is mooi te koppelen an een vakantie. Het staatsbezoek van de koningin noar Oman ging niet döar, toen ging ze privé. Mar die twee dinge hebt niks met elkare te maken. En de verkoop van oorlogsfregatten straks an Oman, is ok toevallig, net as det de dictator d’r zien eigen burgers mee dood giet schieten. Een onbenullig Herculesvliegtuug landt midden in de woestijn van Libië en vlög vrolijk wear weg met 200 man an board. Het Nederlandse leger stuurt een miniscuul helicoptertie en de Libiërs stoat het bie landing al op te wachten. Een lastige kroegtijger uut Roalte wördt döar een politiehond ebeten en dan hef de politie het edoane. De recherche lig in een bie de vöardöare geparkearde anhanger op een topcrimineel te wachten die bie een moat op de koffie giet, mar is te late as de ien de ander dood schöt. Ien op de vijf agenten hef psychische klachten. De man die mie lest bekeuren noe ok wel, denk ik.

Op teletekst stoat allenig de dinge die niet goed goat. Want wat wel goed giet is gin nieuws. Döarumme mos ik via andere weg vernemmen det mien grote vriend Raymond Korse bie de Sallandse Stentor weggiet. En zag ik bie de bakker det ok vandage het brood wear lekker vers in de schappen lag. Bie Zwolle kreeg d’r iene een ongeluk met de auto ömdet ze de wenkbrauwen an het epilearen was.. Det stund wél op teletekst. Mar det d’r tegelieke 50.000 aanderen gïn ongeluk kreeng, det dan wear niet.

Zit ik toch nog met de winst van de Rabobanke. Eigenlijk bent det soort schofterige winstbedragen hillemoal gin nieuws mear. Det ik mut goan betalen voar al mien bankrekkeningen en det ik gin rente op spoargeld kriege, det lik mie dat wel wear nieuws.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.