Home / archiefcentraal / denne van knoldert begappen

denne van knoldert begappen

20.000.000.000

Die ING-directeur hef het toch mar slim an epakt. Vöarig joar nam e gin premie ömdet de overheid hem uut de brand redden. Met mekare hoesten wie 20 miljard euro op öm de banke en het land te redden van het faillissement. As gebaar zei de schurk det e een kear gin bonus hoe’m. Mar hij nam wel een heel grote salarisverhoging. En dit joar kreeg e een bouns, gelieke an zien salaris. O ja, het personeel mut wel inleaveren op het pensieon.

Woar lig de grens van crimineel en niet crimineel?

Ik denk det de bankdirecteur vannacht niet netties met de haane boam de dekkens slöp. Ik denke zelfs det die man de meeste tied van zien leam op een plekke in de wereld zit woar as of e hillemoal gin dekkens neudig hef.

60

Ik had een beköaring ömdet ik met de fietse döar rood ging. Ja, ik schreef d’r al earder oaver en ik vule mie schuldig det betreffende agent inmiddels vermoedelijk in psychische nood verkeart. Mar ik had wel netties de beköaring betaald. Bleek ik de administratiekosten vergetten te weane. Gin zestig, mar 66 euro mos ik betalen. Wat zult ze elachen hemm bie het centraal justitieel incassobureau toen ze mie een neeje boete opleggen. Een earste verhoging van 15 euro.

Ok die ambtenaar slöp vannacht niet netties met de haane boam de dekkens. Hoe doet ze det in het bedrijgeleam? Ten earste zit doar de administratie al bie de kosten in. Ten twidde waarschuw ie earst een kear in plaatsen van een 250 procent boete d’r oaver hen. As het al töt betalen kwaamp, want in het bedrijfsleam geeft ze gin boete an iene die iets dut wat veilig is.

Vandoar det het betreffende ministerie sinds dit kabinet het ministerie van veiligheid is. Ik krieg d’r echt een veilig gevuul bie.

Op het werk höaren ik twee collega’s völle belangrijker zaken besprekken. Die no fly zone boam Libië. Wel of niet succcesvol. En of ze in Japan de meltdown in centrale 2 nog onder controle zollen kunnen hoalen.

Ik verdenke de ING-directeur d’r van det e Libië en Japan genog ofleiding vund öm tussendöar zien 1,3 miljoen an bonus op te strieken. Zoiets kump in de openbaarheid. Dan kun ie det better mar doene as de wereld in brand stiet. Mar het was mie mooi wel opevallen.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.