Home / archiefcentraal / denne van knoldert twee kanten

denne van knoldert twee kanten

Het kabinet hef het toch mar wear eflikt. De belofte was dat op alle snelweang van oons land de snelheid verhoogd wördt van 120 noar 130. En noe – terwijl ze d’r nog mar zo kort zit – is det al elukt met de ofsluutdiek. Ik heb het eam uuterekkend. Ie bent 68 seconden sneller an de oaverkaante. As d’r gin files stoat.

Mien dochter leart thuus det de antrekkende kracht van een gebied met völle werkgelegenheid mooi is vöar det gebied, mar det d’r ok een aandere kaante is: het gebied woar de oale luu achter blieft ömdet het jonge volk het werk achternoa reist. In die aardrijkskundeles ging het oaver de grens van Mexico met de Verenigde Staten. Ik heb het uutelegd op niveau Nieuw Heeten woar ze gin supermarkt mear hebt.

Twee kanten an een zake. Doar doede wie in dit land niet mear an. 68 Seconden is een mooie winst. Oaver de kosten van het vervangen van de verkearsborden en die iene verkeersdode per joar extra, die andere kaante hebbe wie het niet. 130 Kilometer per uur: Klasse. Volgende maatregel: hardrieders keihard anpakken. Nee, det verzin ik niet, det bent ze echt van plan.

Mear vöarbeelden: de earste politicus die noa de val van het vöarige kabinet mear ging verdienen dan de Balkenendenorm was Balkenende. De eis det Mubarak mos oftreden kwam van de VS, die töt gisteren miljarden gaa’m an Mubarak. Het giet ze niet öm het volk, mar öm stabiliteit in het Midden Oosten, want öm goedkope ölie.

In de Europose Unie proat ze oaver het Nederlandse plan allerlei paspoartgegevens digitaal vaste te leng. Wule bent het ienige land die det wul. De rest vindt det onveilig. Mar onze politici doet oons geleum det die gegens niet uutlekt. Net as det de OV-chipkaart veilig is en net as ie vrogger wel zaaddonor konn’ wönn want zie zollen oe toch nooit terugge vinn as biologische vader. Mar ja, toen haa’n ze het DNA nog nie ontdekt…

Meest opvallend vund ik nog wel het idee bewakers mear rechten te gee’m as iemand in de handboeien sloane en met een gummiknuppel meung lopen. De bewakers die ik van mien disco-tied kenne, zollen niks liever wullen. Mar of het verstandig is?

As gezegd: alles hef twee kanten. Ik hoppe det die andere kante met de Provinciale verkiezingen al zichtbaar wördt. Döar niet te stemmen op die partieje die mar ien kante zut.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.