Home / archiefcentraal / denne van knoldert giftig

denne van knoldert giftig

Giftig

‘U kunt allen rustig gaan slapen’ zei de koningin en toen Nederland wakker wönn haa’n de Duutsers oons bezet. Het giet langzaam, mar het gezag van vöarnemstig volk is vanof die dag stukkie bie bittie of enömm.

Nemm Moerdijk. Doar is een complete chemische fabriek de lucht in egoane. De gezagdragers zegt det d’r niks an de hand is, mar niemand geleuft ze. Wie lacht ze uut, die meansen die oons wies wult maken det wie rustig kunt goan sloapen. Mar tegelieke leaft wie met hun leugens. Het zal wel met vallen.

Mar ja, wat mut ie ok aans. Het bestuur kan niet zeng det het leamsgevoarlijk is ewest. Want dan mut d’r in heel Nederland oaveral van det soart giffabrieken verplaatst wönn. Det kan niet want det kost te völle. En het volk hef d’r ok wel vrede met. Gin kankerverwekkende stoffen? Gelukkig, geruststellend ok.

Zo bange bint de meesten van oons trouwens ok niet. Oons eigen lichaam is ok een chemische fabriek en as ie ziet wulk risico wule doar ollemoal met loopt. Roken, drinken, bespoten gruunte, antibioticakippen, gekke koeien, blauwtong, alles stoppe wie d’r in. Kan oons het schellen. Pas op een te vrog sterfbedde, as de boel as een kiloknaller uut mekare dreigt te knappen, hebbe wie spiet.

Nee, Moerdijk… niks an de hand. Det was vrogger met Tjernobil wel aans. Een ongeluk doar in de kerncentrale, kossen bie oons thuus de spinazieoogst. Gooi die mar weg, zei de oaverheid. De tactiek begreep ik pas later. Het was een Russisch ongeluk. In verband met de koale oarlog kwam het mooi uut die rare rooie russen in een kwoad daglicht te stellen. De spinazie van det joar waren wie kwied, mear last haa’n wie d’r niet van, mar wat een rotzakken die Russen.

Geleuf en ongeleuf. Ik keke zoaterdag noar Zembla. Det is een naar, want confrontearend programma oaver wat d’r ollemoal mis giet in ons regel-laandtie. Het ging oaver gifspuiten op het platteland. Det schient vöar bewoners van het platteland leavensgevoarlijk te weane. Mar de oaverheid is nog niet an neeje regels toe. Die löpp met regels tien joar achter op wat de wetenschap al weet.

De meeste gif giet trouwens niet op Vechtdalse grond. Nee, in het westland hebt ze de meeste gif neudig öm oonze lelies en tulpen mooi te loaten weane.

Mie maakt ze vöartaan ok niet mear blie met een bössie bloemen. Want det is feitelijk een bössie gif.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.