Home / archiefcentraal / denne van knoldert brandon

denne van knoldert brandon

Met zo’n nieuw kabinet is het toch mar wear verrassend te ziene wie d’r woar vöar an enömm is. Die Veldhuijzen van Zanten, staatssecretaris met dubbel paspoart, blik bevobbeld dienst te doene as wie in Nederland meansen an de ketting legt. Was heel slim van Marlies, goed vöar het mediamoment, öm bie Brandon op bezuuk te goane.

Het wul op det vlak nog niet zo goed lukken met het kabinet Wilders. Opstelten ging bie de brand in Moerdijk kieken mar dörm vanwege de giftige rookwolken het bussie niet uut. Marlies ging d’r bie Brandon vandöar ömdet het joch onwelvoegelijk taalgebruuk hantearen…

In het geval van Ivo is de officiële lezing det ze brandwearvolk niet vöar de voeten wollen lopen. Mar de earste Wikileaks-cable löt mails van ambtenaren ziene die het oaver gif hebt.

In het geval van Marlies hebt ze al niet iens mear probeart een smoes te bedenken det Brandon wat onzeker wönn van de plotselinge andacht. D’r was een verpleegkundige bie die het ollemoal zo zat was, die zol het toch wel verklikken.

Ik zie det zo vöar mie. Kump doar zo’n staatssecretaris met de beste kleare an op een ofdeling woar het niet fris rök, het behang slecht an de mure zit en het licht te scherp is. Het lik niks op höar Haagse werkkamer woar ze al die bezunigingen op de zörg bedenkt. En dan mut ze noar Brandon (woar wule d’r in ons land niet 40, mar wel 400 van hebt, blik oaver een tiedje uut nieuwe Wikileaks-cables). Die röp: “Smearig kutwief, döar ule beleid zit ik hier an de stikke”. Ja, dan is het bezuuk wear gauw of elopen.

“Ik heb het met eigen ogen gezien”, zei de staatssecretaris geschokt. Het mut mar ‘ns of elopen weane met die politici die zelf een kiekie komt nemmen. Is het niet gebeurd as ze niet bent weazen kieken? En denkt ze de werkelijkheid te ziene as ze wél langs komt? Nee, natuurlijk niet, de urine was ’s monns op de ofdeling met wat extra chloor goed schone emaakt, vandoar die vremde lucht.

“We gaan de knapste koppen van het land zoeken om dit op te lossen”, zei de staatssecretaris geschokt. Is d’r ok niet een sprookje woarin de koning de knapste dokters van het land zög öm het prinsesje better te maken?

Det sprookje had een mooi eind: toen de prinses better werd, wol de koning det iederiene in het land goeje zörge kreeg, ok de zieken.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.