Home / archiefcentraal / denne van knoldert pws

denne van knoldert pws

Woar het de ofkorting van is, weet ik niet, mar een PWS is wat vrogger een tentamen was en ie wult d’r dus een zo hoog mogelijk cijfer vöar halen. Een tien met een griffel döarumme, vöar de jongen die vöarige wekke het brandalarm van zien middelbare schoele an de proat kreeg en de brandwear leut uutrukken. Zien PWS-werkstuk was goan smeulen.

Noe was ‘smeulen’ vaste niet ien van de leerdoelen. En ömdat het gin communicatie-PWS betröf zal ‘andacht trekken’ ok wel gin ‘competentie’ ewes weane. Mar toch.

Sterk verhaal: met het eindexamen Nederlands was de opdracht vöar een opstel: ‘wat is lef’. Een leerling vullen zien name in, schreef de titel op, met doaronder: ‘dit is lef’. Het verhaal vertelt niet welk cijfer hij doarmet kreeg. Ik kan det vöar dit verhaal wel verzinnen (een 1 ömdet hij te weinig woarden gebruken, woardöar de helfte van de leazers boos wördt op de leraar; een 9 ömdet e lef had, woardöar de andere helfte kwoad wördt op de leraar. Die luu kunt het ok nooit goed doene), mar ik weet het gewoon niet. Jammer.

Reacties op het brandalarm (op de dag van de earste sneeuw van disse winter): “Earst eam mien jasse halen, het is hartstikke koald buten”. “Wie hölt d’r noe een oefening met zulk wear?”

Ik hadde lest op mien werk ok een brandoefening. Ik was met een paar man in het trappenportaal op weg noar een vergadering. Van beneden noar boam. Onderweg vleung d’r ollemoal luu vöarbie van boam noar beneden die vöar een brandalarm op de vlucht waren. Ik had wel een hoog döardringend geluud ehöard, mar vreug mie earder of wanneer ze det rotgeluud uut zollen zetten dan det ik an brand dache.

Afijn, wule bent twee verdiepingen hogerop rustig goan vergaderen. Anderhalf uur later wönn het wear wat drukker in de gangen. Mien collega’s mochen wear noar binnen. Of wule niet noar buten waren egoane. “Nee gin tied, wie haa’n een vergadering.” Bleek het echte brand. Een prullebak ergens buten an het gebouw…

Met al die oefeningen weet wie precies wat wule mut doene bie brand. Mar wie bent het oefenen zat en reageert niet mear. Ok niet bie een echte brand. En dan blik det ok eigenlijk niet neudig. Want d’r hoef mar eans een klein bittie rook te weane of het hele gebouw mut löag.

PWS-opstelopdracht vöar volgend joar: ‘nem de burger serieus’.

Denne van Knöldert

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.