Hoe ie een elektrisch droad terugge de stofzuger inkriegt… Ik schreef er de vöarige kear oaver. Het hölt niet allenig mie bezig, bleek uut de reacties. “Zie mut gewoon twee hoaken an de stofzuger maken om het droad d’r ömme hen te dreien”, vund iene. “Alles wat d’r extra op zit, kan kapot goane”, vund een aander.
“Slim toch, zukke dinge die het leam makkelijker maakt”, vund een reageerder die doar verder in wol learen. Ien idee had e al: schappen in de supermarkt vervangen vöar schoefladen. Niet vöar het gemak van het winkelend publiek, mar vöar het gemak van de inpakkers.
Supermarkt-inpakker is werk woarmee studenten geld verdient öm dinge te kopen die ze niet neudig hebt en woardöar ze langer oaver de studie doet dan neudig, woardöar ze een joar later het echte geld verdient…
Mien advies: Zuuk werk det een bittie bie oe opleiding past. Noa, det had disse jongen van de schoefladen in de oaren eknöpt. Hij wol industrieel ontwerper wönn en gaf tiedens het vakken vullen zien oong goed de kost. ‘ Wat kan hier better?’
En zo bedach hij de schoeflade öm spiegelen in de supermarkt te vergemakkelijken. Bie spiegelen zörg ie d’r vöar det het product altied vöaran in het schap stiet. De vakken lacht oe dan altied vriendelijk tegemoet wat de kooplust opwekt. Winkelend publiek kan altied goed bie de producten. En het hef as vöardeel det verse vöarroad altied achterin het schap ezet wördt zodet earst de oaldere producten opgoat.
Vöaral vanwege det leste bent de schoefladen zo handig. De producten simpelweg noar vöaren schoem, wul nog wel. Mar as ie d’r ok nog neeje producten achter mut zetten, dan heb ie lange arme neudig en völle ruumte tussen de producten.
Niet ieder vöardeel hef zien noadeel. Het vöardeel van schoefladen hef juust extra vöardelen hef. As ie gin ruumte tussen de schappen mear neudig hebt, kun ie die te kleine ruumtes van noe wegsanearen. De bosschoppen lacht oe in de lange riejen van de supermarkt nog mear toe, het lik ollemoal nog voller. Ie wint d’r ok nog ‘ns zo völle ruumte mee, det d’r in de heugte van een schap een extra rieje producten eplaatst kan wönn. Dus kan de baas kiezen vöar een kleinere supermarkt met eam völle producten of vöar mear producten in de huidige supermarkt.
De slimmerik die dit bedach, die mut nog goan studearen. Dus wult ule dit idee nog eam stille hoalen?
Denne van Knöldert
Meer foto's