Home / archiefcentraal / denne van knoldert een youpie

denne van knoldert een youpie

Ie hebt een völ te klein leazersgezelschap öm dinge in gang te zetten, zeiden ze mie lest toen ik wear een kear probearen uut te leng det het niet allenig de bankdirecteuren bent die oonze maatschappij noar de kloten helpt. “D’r kump een moment det wie ok niet mear pikt hoe KPN, Ziggo, ambtenaren, Tele2 en nuum mar op oons behandelt “, probear ik steeds uut te leng. En met bliedschap kan ik ule vertellen det het zo verre is. Mien columns bent bie Youp van ’t Hek an komm rollen. Denk ik.

Ik reup in januari 2009 al öm actie toen ik mie as pispöaltie döar de ien of aandere antwoordmachine an de kaante had loaten zetten ömdet ik een verkeard keuzenummer in etoetst hadde.

Youp hef zien pijlen noe op T Mobile ericht. Mar ik zol zeng: de pijlenkoker is per definitie te klein öm op alle onzin in de wereld te schieten.

Zo hef Windesheim een glazen gebouw loaten nearzetten öm an te gee’m det de organisatie transparant is. Ie kunt wel bedenken hoe weinig transparant det doar mut weane as ie een gebouw neudig hebt öm det te bewiezen. En tegelijke loopt werknemmers met de kop teeng al det raamwerk.

Zo was ik ooit hellig op de procedure van paspoart anvroang. Ik heb uuteindelijk een handtekening vervalst öm de vaart d’r in te hoalen en wie bent d’r inmiddels al töt met in Cuba ewest.

Zo schreef ik niet ien, niet twee, mar drie koloms oaver verhuusproblemen van tillefoon en internet bie de KPN. Wat zeg ik? Vier kear!

Zo oaverkwaamp mie een wel heel raar verhaal öm een politieköarmerk te krieng.

Zo ervaren ik hoe onwelwillend Postbus 51 is öm oe verder te helpen en hoe de KvK an verplichte winkelnering dut zonder det iemand d’r better van wördt.

Dagelijks giet det verder. Vöarige wekke nog. Mien zunne hef tiedelijk rolstoelvervoer noar schoele neudig. “Minstens dree moand”, zeg de chirurg. “Doarnoa ziet wie wel wieder.” De gemeente vergoedt het vervoer as het langer dan dree moand duurt. Det wete wie dus oaver dree moand pas.

Of woon-werk-treinkaarties via mien werk kopen. Det mut met tiene tegelieke. En ik mag ze – bie te volle an het eind van het joar – met viefe tegelieke wear inleaveren. As ik d’r zestiene neudig hebbe, mut ik d’r dus twintig kopen, vieftiene opmaken. Viefe terugge leaveren en iene bie het station kopen. Logisch toch?

En het gekke is: wie pikt het ollemoal.

Denne van Knöldert.

Lees ook

Boek van de Week: Het Rosie resultaat

OMMEN – Het boek van de week van Bibliotheek Ommen is ‘Het Rosie resultaat’ van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.